Prezident Shavkat Mirziyoev Quvasoy qalasındaǵı “Crown Ceramic” qospa kárxanasında keramogranit plitalar islep shıǵarıw procesi menen tanıstı.
Elimizde jergilikli shiyki zat tiykarında importtıń ornın basatuǵın hám eksportqa jaramlı ónimler islep shıǵarıwdı keńeytiwge ayrıqsha itibar qaratılmaqta. Búgingi kúnde respublikada 47 keramikalıq plita islep shıǵarıwshı kárxana jumıs alıp barmaqta. Ótken jılı olar tárepinen 47,2 million kvadrat metr ónim islep shıǵarılıp, ishki talap 128,6 procentke qaplandı.
Mámleketimiz basshısınıń 2024-jıl 16-dekabrdegi Ferǵana wálayatın sociallıq-ekonomikalıq rawajlandırıwǵa baylanıslı qararına muwapıq, 2025-jılı Quvasoy qalasında “Crown Ceramic” qospa kárxanası shólkemlestirildi. Jılına 8 million kvadrat metr keramogranit plita islep shıǵarıwǵa mólsherlengen joybar 1 trillion sumlıq ónim tayarlaw, 665 milliard sumlıq qosımsha qun jaratıw hám 35 million dollarlıq eksporttı ámelge asırıw imkaniyatlarına iye.
Kárxanada jergilikli shiyki zattan paydalanıw dárejesi 97 procentti quramaqta. Onıń tiykarǵı bólegi Quvasoydaǵı kánlerden, sonday-aq, Tashkent wálayatınıń Angren aymaǵınan alıp kelinedi. Óndiris procesinde bir kúnde 600 tonna saylandı tas, 100 tonna qızıl kaolin hám 100 tonna kúlreń kaolin jumsaladı.
Bul jerde Oraylıq Aziya hám Shıǵıs Evropa bazarlarında az ushırasatuǵın iri formattaǵı eksportqa qolaylı keramogranit plitalar islep shıǵarılıp, 6 túrli ólshemdegi ónim tayarlanadı.
Zavodta ápiwayı say tasınan joqarı qosımsha qunǵa iye ónim jaratılmaqta. Dala shpatı islep shıǵarıw, kaolin quramındaǵı kómirdi tazalaw processleri jolǵa qoyılǵan. Bul joqarı sapalı keramogranit islep shıǵarıwda úlken áhmiyetke iye.
Processler tolıq sanlastırılıp, energiya únemlewshi úskenelerden paydalanılmaqta. Ekologiyalıq talaplarǵa da ayrıqsha itibar qaratılǵan: zamanagóy shań jutıw úskeneleri hám filtrler ornatılǵan. Jawın suwları jıynap alınıp, óndiriste paydalanıladı. Paydalanılǵan suwdı tazalaw hám óndiriske qayta baǵdarlawdıń jabıq shınjırı jaratılǵan.
Zamanagóy texnologiyalar esabınan shiyki zat tayarlawda elektr energiyasınıń jumsalıwı 20 procentke shekem azayǵan. Kúndizgi jumıs procesinde tábiyiy jaqtılıqtan paydalanıladı.
Bul jerde islep shıǵarılıp atırǵan keramikalıq plitalar sapa hám texnikalıq kórsetkishleri boyınsha Italiya, Ispaniya hám Qıtay ónimleri menen básekilese aladı. Bıyıl yanvar-mart aylarında kárxana Qırǵızstan hám Tájikstanǵa 400 mıń dollarlıq 80 mıń kvadrat metr ónim jetkerip berdi. Eksport geografiyasın keńeytiw maqsetinde Qazaqstan, Rossiya hám Evropa mámleketleri menen shártnamalarǵa qol qoyıw ilajları kórilmekte.
Kárxanada házirgi waqıtta import etiletuǵın glazur ónimlerin lokalizaciyalaw boyınsha ilimiy-ámeliy jumıslar da alıp barılmaqta. Bahası 20 million dollar bolǵan, jılına 50 mıń tonna glazur islep shıǵarıw quwatlılıǵına iye jańa joybar 2026-jıl sentyabrde iske qosıladı. Onıń nátiyjesinde jáne 100 jumıs ornı jaratılıwı, qosımsha 10 million dollarlıq eksport ámelge asırılıwı, sırlaw ónimlerine bolǵan talaptıń 85 procentin kárxananıń óz kúshi menen qaplaw rejelestirilgen.
Mámleketimiz basshısı kárxanada ónimdi islep shıǵarıw hám saqlaw processleri, engizilgen texnologiyalar hám eksport rejeleri menen tanıstı. Bunday birgeliktegi kárxanalar jergilikli shiyki zattı tereń qayta islew, joqarı qosımsha qun jaratıw arqalı aymaq ekonomikasın rawajlandırıwda úlken áhmiyetke iye ekeni atap ótildi.
ÓzA