Ferǵana oypatlıǵında Qoqand, Namangan, Ándijan hám Marǵılan qalaların baylanıstırıwshı jańa elektropoezd qatnawı jolǵa qoyıldı.
Prezident Shavkat Mirziyoev jámiyetshilik wákilleri menen birge usı jónelistegi birinshi poezdda Qoqand qalasınan Marǵılan qalasına keldi.
Bul joybar Ózbekstan Respublikası Prezidentiniń 2025-jıl 27-dekabrdegi “2030-jılǵa shekem temir jol transportında jergilikli jónelislerde jolawshı tasıw kórsetkishlerin arttırıw ilajları haqqında”ǵı qararınıń orınlanıwı sheńberinde ámelge asırıldı.
Joybar xalıq tıǵız jasaytuǵın Ferǵana oypatlıǵında transport qatnawın jaqsılaw, puqaralarǵa qolaylı, qáwipsiz hám arzan xızmet kórsetiw, jolawshı tasıw kólemin arttırıwǵa xızmet etedi.
324 kilometrlik bul temir jol aylanbası oypatlıq wálayatların óz-ara jáne de jaqınlastırıp, xalıq, isbilermenler hám turistler ushın jańa imkaniyatlar ashadı.
Jańa poezd Tashkent jolawshı vagonların qurıw hám ońlaw zavodında islep shıǵarılǵan. Altı vagonnan ibarat, 586 orınlıq poezd saatına 120 kilometrge shekem tezlikte háreketlene aladı.
Bilet bahası 15 mıń sum etip belgilengen. Bul avtomobil transportına salıstırǵanda ádewir arzan hám qolaylı. Kúnine 1,5 mıń, jılına derlik 600 mıń jolawshıǵa xızmet kórsetiw imkaniyatı aymaqta ekonomikalıq jedellikti arttırıwǵa xızmet etedi.
Vagonlarda klimat qadaǵalaw sisteması hám kondicionerler ornatılǵan. Biypul Wi-Fi, gadjetler ushın USB-portlar bar. Mayıplıǵı bolǵan shaxslar ushın arnawlı kótergishler, keń orınlar hám qolaylastırılǵan hájetxanalar názerde tutılǵan. Velosipedlerdi tasıw ushın bekkemlegishler jolawshılardıń sapardan keyin háreketleniw imkaniyatın jáne de keńeytedi.
Vagonlardaǵı videobaqlaw hám soqqı kúshin azaytıwshı krest-sistemalar xalıqaralıq qáwipsizlik standartlarına sáykes keledi.
Jol dawamında Prezidentimiz wálayat belsendileri menen aymaqta júz berip atırǵan ózgerisler haqqında sáwbetlesti.
Jańa temir jol aylanbası Ferǵana oypatlıǵınıń turizm potencialın da jańa basqıshqa alıp shıǵatuǵını atap ótildi. Bándirgiler átirapında xızmet kórsetiw shaqapshaları, miymanxanalar hám ulıwma awqatlanıw orınların shólkemlestiriw zárúr ekenligi, bul jergilikli xalıq ushın qosımsha dáramat deregin jaratıwı atap ótildi.
ÓzA