Prezident Shavkat Mirziyoevtiń Ferǵana wálayatına saparı Qoqand qalasındaǵı “Jańa Ózbekstan” massivinde ámelge asırılıp atırǵan dóretiwshilik jumısları menen tanısıwdan baslandı.
Mámleketimizde xalıqtıń jasaw sharayatın jaqsılaw, zamanagóy qala qurılısı úlgilerin aymaqlarǵa alıp kiriwge ayrıqsha itibar qaratılmaqta. Bul baǵdarda orınlarda qurılıp atırǵan “Jańa Ózbekstan” massivleri xalqımızdıń abadanlıǵın arttırıwǵa qaratılǵan iri sociallıq joybarlardan biri bolmaqta.
Áyyemgi Qoqand qalasında boy tiklep atırǵan jańa massiv te tek ǵana turaq jay kompleksi emes, al aymaqtıń ekonomikalıq hám sociallıq kórinisin ózgertip atırǵan zamanagóy oray sıpatında qáliplespekte.
Qoqand ázelden xalıq tıǵız jasaytuǵın, isbilermenlik rawajlanǵan qalalardan biri. Sol sebepli, bul jerde turaq jayǵa bolǵan talap jıl sayın artıp barmaqta. Eskirgen infrastruktura hám sheklengen turaq jay maydanları qalanı jańa tiykarda keńeytiwdi talap etpekte. Prezidentimizdiń eki jıl aldın Ferǵana wálayatına saparı dawamında berilgen tapsırmaları tiykarında qurılıp atırǵan bul massiv mine usı talaptıń ámeliy sheshimi bolmaqta. Bul jerde shańaraqlar zamanagóy hám barlıq qolaylıqlarǵa iye kvartiralar menen támiyinlenbekte.
Massivti qurıw ushın jámi 1 trillion 850 milliard sum qarjı qaratılǵan. Aymaqta 25 mıń xalıq jasawına mólsherlengen bir pútin infrastruktura qáliplestirilmekte. 84 kóp qabatlı jay menen birge zamanagóy mektepler, mektepke shekemgi bilimlendiriw shólkemleri, joqarı oqıw ornı, biznes hám sawda orayları jáne xalıqtıń dem alıwı ushın baǵlar qurılıwı názerde tutılǵan.
Bul jumıslar jańa massiv turǵınları ushın úyinen uzaqlaspastan jumıs islew, bilim alıw, sawda hám xızmetlerden paydalanıw, mazmunlı dem alıw imkaniyatın jaratadı.
Búgingi kúnde joybardıń birinshi basqıshı tabıslı juwmaqlandı, 4 mıń 394 kvartiradan ibarat 56 on qabatlı turaq jay paydalanıwǵa tapsırıldı. Tayar ońlanǵan kvartiralar xalıqqa 35 procentlik baslanǵısh tólem tiykarında, jıllıq 16 procent stavkada 20 jıl múddetke berilmekte.
Mámleketimiz basshısı jańa kvartiralardıń birine kirip, jaratılǵan sharayatlar hám úskeneleniwi menen tanıstı. Massivtiń sociallıq áhmiyetine ayrıqsha toqtap ótip, bul jerde qáliplesip atırǵan jańa ortalıq adamlardıń dúnyaǵa kózqarasın, turmıs sapasın hám turmıs mádeniyatın arttırıwǵa xızmet etiwi kerek ekenligin atap ótti.
Ferǵanalı nuranıylar menen qızǵın sáwbet bolıp ótti.
Olar sociallıq mámleket principi tiykarında orınlarda insan mápleri támiyinlenip atırǵanı, zamanagóy bilimlendiriw hám medicina mákemeleri, abat máhálleler, jańa kárxanalar hám isbilermenlik imkaniyatları xalıqtıń turmısın ózgertip atırǵanın atap ótti. Nuranıylar bul jumıslar elde toqshılıq, abadanlıq hám sociallıq turaqlılıqtı bekkemlep atırǵanın aytıp, mámleketimiz basshısına minnetdarshılıq bildirdi.
Usı jerdiń ózinde Prezidentimiz “Jańa Ózbekstan” massiviniń ekinshi basqıshı hám Qoqand qalasın rawajlandırıw boyınsha prezentaciya menen tanıstı.
ÓzA