Ózbekstan Respublikası Prezidenti Shavkat Mirziyoev Astana qalasında ótip atırǵan Regionallıq ekologiyalıq sammit sheńberinde BMShtıń Qorshaǵan ortalıq boyınsha baǵdarlamasınıń atqarıwshı direktorı Inger Andersen menen sóylesti.
Qorshaǵan ortalıqtı qorǵaw, turaqlı rawajlanıw hám klimat mashqalalarına qarsı gúresiw tarawındaǵı birge islesiwdiń tiykarǵı baǵdarları kórip shıǵıldı.
Óz-ara birge islesiw, sonıń ishinde, milliy ekologiyalıq bayanatlardı tayarlaw, qorshaǵan ortalıqtı monitoring etiw sistemasın jetilistiriw hám institucionallıq potencialdı bekkemlew máselelerinde izbe-iz rawajlanıp atırǵanı atap ótildi.
Atqarıwshı direktor Ózbekstanda ámelge asırılıp atırǵan “Jasıl mákan”, “Biomiyras”, “Taza hawa”, “Shıǵındısız aymaq” hám “Ekomádeniyat” sıyaqlı milliy joybarlardı joqarı bahaladı. Olardıń ekologiyalıq turaqlılıqtı támiyinlew hám xalıqtıń turmıs sapasın arttırıwdaǵı áhmiyeti atap ótildi.
Inger Andersen, sonday-aq, Ózbekstan Prezidentiniń búgingi sammitte alǵa qoyılǵan baslamaların ámelge asırıw boyınsha ámeliy sheriklikti keńeytiwge tayar ekenin bildirdi.
ÓzA