Búgingi kúnde awıl xojalıǵı ónimleriniń eksportın keńeytiw hám xalıqaralıq bazarlarǵa shıǵıwda fitosanitariyalıq qáwipsizlikti támiyinlew úlken áhmiyetke iye bolmaqta. Usı kózqarastan, aldıńǵı tájiriybege iye mámleketler menen birge islesiwdi rawajlandırıw Ózbekstan ushın tiykarǵı baǵdarlardan biri bolıp esaplanadı.
Awıl xojalıǵı ministrligi janındaǵı Ósimlikler karantini hám onı qorǵaw agentliginiń direktorı Ibrohim Ergashev Niderlandiya Patshalıǵı karantin xızmeti wákili Lianna Kersbergen basshılıǵındaǵı delegaciyanı qabılladı.
Ushırasıw dawamında eki mámleket arasında ósimlikler karantini hám onı qorǵaw tarawındaǵı birge islesiwdi jáne de bekkemlew, xalıqaralıq sawdada fitosanitariyalıq qáwipsizlikti támiyinlew hám aldınǵı tájiriybeler almasıwın keńeytiw máseleleri dodalandı.
Niderlandiya tárepi fitosanitariyalıq qadaǵalawda qollanılıp atırǵan zamanagóy qatnaslardı – qáwipke tiykarlanǵan qadaǵalaw sisteması, sanlı sertifikatlaw (e-Phyto), shegara punktlerinde kinologiya xızmeti, Oraylıq fitosanitariyalıq laboratoriyası hám kóshpeli laboratoriyalar, sonday-aq, agroanalizler ótkeriwge mólsherlengen mobil laboratoriyalardıń jumısın joqarı bahaladı.
Sonday-aq, Oraylıq eksport shtabında bolıp ótken ushırasıw dawamında miymanlar Ózbekstannıń awıl xojalıǵı eksport potencialı menen jaqınnan tanıstı. Olar mámleketimizden Niderlandiyaǵa miywe-ovoщ ónimlerin eksport etiwge qızıǵıwshılıq bildirip, ásirese, jergilikli limon sortlarınıń sapası hám dámin ayrıqsha atap ótti.
Sóylesiwler dawamında ósimlikler salamatlıǵı hám azıq-awqat qáwipsizligin támiyinlew, eksport ónimlerin sertifikatlaw, xalıqaralıq bazarlarǵa shıǵarıw, tuqımlar importı hám fitosanitariyalıq talaplardı muwapıqlastırıw, sonday-aq, alma hám tuqımlı miyweler boyınsha fitosanitariyalıq qáwip-qáter analizin ámelge asırıw máseleleri boyınsha pikir alısıldı.
Maǵlıwmat ornında atap ótiw kerek, Niderlandiya agrar ónimler eksportı boyınsha dúnyada jetekshi mámleketlerden biri bolıp esaplanadı. Mámlekette joqarı texnologiyalı awıl xojalıǵı, rawajlanǵan logistika hám reeksport modeli qáliplesken. Sonlıqtan, bul birge islesiw Ózbekstan ónimleriniń Evropa bazarına shıǵıw imkaniyatların bunnan bılay da keńeytiwde úlken áhmiyetke iye.
Statistikalıq maǵlıwmatlarǵa bola, 2025-jılı Ózbekstannan Niderlandiyaǵa 2,6 mıń tonnadan aslam miywe-ovoщ eksport etilgen bolsa, 2026-jıl aprel jaǵdayına bola bul kórsetkish 1,2 mıń tonnaǵa jetken.
Muhayyo Toshqoraeva, ÓzA