Huqıqıy múnásibet
Mámleketimiz basshısınıń 2021-jıl 9-avgusttaǵı “Jetim balalar hám ata-ana qaramaǵınan ayırılǵan balalardı mámleket tárepinen qollap-quwatlawdıń jańa sistemasın engiziw ilajları haqqında”ǵı qararına bola, turaq jayǵa iye bolmaǵan hám turaq jayǵa mútájler sıpatında esapta turǵan jetim balalar hám ata-ana qaramaǵınan ayırılǵan balalarǵa olar 18 jasqa tolǵanınan keyin kóp kvartiralı turaq jaylardan turaq jay ajıratılıwı belgilengen.
Qanday jaǵdaylarda turaq jay beriw biykar etiliwi múmkin?
Bul boyınsha Tashkent mámleketlik yuridikalıq universiteti Yuridikalıq klinikasınıń xızmetkeri Imomali Tuev tómendegishe túsinik berdi:
– Atap aytqanda, turaq jay tómendegi kategoriyadaǵı, óz atında turaq jayı bolmaǵan shaxslarǵa beriledi:
Jetim balalar, sonıń ishinde, ata-anası qaytıs bolǵan yamasa qaytıs bolǵan dep járiyalanǵan balalarǵa, ata-ana qaramaǵınan ayırılǵan balalar, atap aytqanda, ata-anası ata-analıq huqıqınan ayırılǵan, qarım-qatnasqa uqıpsız dep tabılǵan, biydárek joǵalǵanda beriledi.
Biraq, processte tómendegi jaǵdaylar anıqlansa, shaxstı turaq jay menen támiyinlew náwbetine qoyıwdan bas tartıladı yamasa bas tartıw ushın tiykar boladı.
Sonıń ishinde, múlk huqıqı bar bolǵanda. Eger shaxstıń atında mámleketlik dizimnen ótken jasaw ushın jaramlı jeke turaq jayı bolsa, statustıń tastıyıqlanbawı, yaǵnıy jetimlik yamasa ata-ana qaramaǵınan ayırılıw faktin tastıyıqlawshı rásmiy hújjetler, atap aytqanda, sud qararı, gúwalıqlar bolmasa turaq jay beriwden bas tartıladı.
Sonday-aq, sistemaǵa kirgiziw múddeti 23 jasqa shekem etip belgilengen bolıp, eger shaxs 23 jasqa tolǵan bolsa hám usı waqıtqa shekem “onlayn-náwbet” sistemasına kirgizilmegen bolsa, rayon (qala)lıq komissiya tárepinen ótkerilgen úyreniw nátiyjesinde shaxstıń jasaw ushın basqa jaramlı ornı bar ekenligi anıqlanǵanda da turaq jay beriliwi biykar etiledi.
Maǵlıwmatlarǵa bola, “Insan” sociallıq xızmetler orayları turaq jayǵa mútáj jetim balalar hám ata-ana qaramaǵınan ayırılǵan balalardı olar alternativ jaylastırıw túrlerinde bolıwı hám oqıw-tárbiya mákemesinde tárbiyalanıw múddeti juwmaqlanıwınan bir jıl aldın turaq jayǵa mútájler sıpatında “onlayn-gezek” málimleme sistemasına kirgizedi.
Turaq jayǵa mútáj jetim balalar hám ata-ana qaramaǵınan ayırılǵan balalar múddetinen aldın da “onlayn-náwbet” málimleme sistemasına kirgiziliwi múmkin.
Múddetinde “onlayn-gezek” málimleme sistemasına kirgizilmey qalǵan, turaq jayǵa mútáj bolǵan jetim balalar hám ata-ana qaramaǵınan ayırılǵan balalar olar 23 jasqa tolǵanǵa shekem “onlayn-gezek” málimleme sistemasına aymaqlıq basqarmalardıń juwmaǵı tiykarında kirgiziledi.
Turaq jaylar bul shaxslar 18 jasqa tolǵannan keyin ajıratıladı.
Gulnoza Boboeva,
ÓzA