Puqara R.D. tárepinen salıqlar óz waqtında tólenbegenligi aqıbetinde, onıń atında anıqlanǵan xalıqqa xızmet kórsetiw ornı “E-auksion” elektron onlayn sawdalarına shıǵarıldı.
Májbúriy orınlaw byurosınıń Taqıyatas rayonı bólimi is júrgiziwinde puqaralıq isleri boyınsha Nókis rayonlar aralıq sudınıń orınlaw hújjetine tiykarlanıp qarızdar R.D.dan óndiriwshi Taqıyatas rayonı Mámleketlik salıq inspekciyası paydasına jámi 29 million sumnan artıq qarızdı óndiriw belgilengen.
Orınlaw hújjeti 2025-jıl 15-dekabr kúni kelip túsken bolıp, sol kúnniń ózinde orınlaw isi qozǵatılǵan. Nızam talaplarına muwapıq, qarızdarǵa qarızdı ıqtıyarlı túrde qaplaw ushın múddet berilgen. Biraq belgilengen múddette qarızdar tárepinen tólem ámelge asırılmaǵan.
Bunnan soń májbúriy orınlaw háreketleri baslanıp, girew múlk sıpatında dizimge alınǵan dúkán belgilengen tártipte xatlandı. Bul múlktiń baslanǵısh bahası 506 million sum etip belgilendi.
Keyin ala bul dúkán “E-auksion” elektron sawdaları arqalı satılıp, túsken qarjılar esabınan qarızdardıń Mámleketlik salıq inspekciyası aldındaǵı qarızdarlıǵı qaplanadı.
Qaraqalpaqstan xabar agentligi.