Házirgi waqıtta elimizdiń barlıq aymaqlarında ÓzLiDeP tárepinen alǵa qoyılǵan “Xalıq penen birge” ulıwma milliy baǵdarlaması sheńberinde úgit-násiyatlaw hám ámeliy jumıslar izbe-izlik penen alıp barılmaqta. Eń áhmiyetlisi, baǵdarlama qabıl etiliwi menen onıń orınlanıwı keshiktirilmey baslanǵanı, partiyanıń sózden ámeliyatqa ótiw principine qatań ámel etip atırǵanın kórsetedi. Búgin ÓzLiDeP belsendileri, deputatlar hám volontyorlar máhállelerge kirip, xalıq penen júzbe-júz sóylesip, olardı qıynap atırǵan mashqalalardı úyrenbekte hám ornında sheshiw ilajların kórmekte.
Ámiwdárya rayonında da “Xalıq penen birge” baǵdarlaması sheńberinde ámelge asırılıp atırǵan jumıslar ayrıqsha itibarǵa ılayıq. Atap aytqanda, “Beruniy” hám “Durunki” mákan puqaralar jıyınlarında “Abadanlıqqa qaray birinshi qádem” atamasında ótkerilgen dodalawlar xalıq penen ashıq hám nátiyjeli sóylesiwdiń ayqın úlgisi boldı. Onda partiya wákilleri, deputatlar hám belsendiler qatnasıp, jaslar hám hayal-qızlardı qıynap atırǵan mashqalalar hár tárepleme dodaladı.
Dodalawlar procesinde hár bir máhálledegi bar mashqalalar tiykarında “máseleler kartası”n qáliplestiriwge ayrıqsha itibar qaratıldı. Bul bolsa mashqalalardı sistemalı túrde sheshiw, ásirese, jumıssız jaslar hám hayal-qızlardı bántlikke tartıwda úlken áhmiyetke iye. Olardıń jumıs tabıwına tosqınlıq etip atırǵan faktorlardı saplastırıw, kásipke oqıtıw, qayta tayarlaw hám isbilermenlikke baǵdarlaw boyınsha anıq ilajlar belgilep alındı.
Sonıń menen birge, ushırasıwlar dawamında xalıq tárepinen kóterilgen sociallıq máseleler de itibardan shette qalmadı. Sonıń ishinde, “Orta qala” máhállesi turǵınları tárepinen balalar maydanshasın qurıw hám jollardı ońlaw máseleleri kóterildi. Jaslar tárepinen bolsa jeke menshik baqsha shólkemlestiriw boyınsha huqıqıy másláhátler alındı. Bunday múrájatlardıń ornında kórip shıǵılıwı partiyanıń xalıqtıń dártine biypárwa emes ekenligin jáne bir márte kórsetti.
Eń áhmiyetlisi, ámeliy jumıslardıń nátiyjesi sıpatında “Durunki” máhállesinde jaylasqan 56-sanlı mektep oqıwshıları ushın “Deputat stipendiyası” engizildi. Bul baslama arqalı ayrıqsha bahalarda oqıp atırǵan, sociallıq qorǵawǵa mútáj shańaraqlardıń perzentlerin qollap-quwatlaw, olardı bilim alıwǵa xoshametlew maqset etilgen. Bul bolsa insan kapitalına investiciya kirgiziw arqalı turaqlı rawajlanıwǵa erisiwdiń áhmietli faktorı bolıp esaplanadı.
Sonday-aq, partiyanıń “Bir shańaraq – bir qáwender” akciyası sheńberinde ámelge asırılıp atırǵan jumıslar da ayrıqsha itibarǵa ılayıq. Atap aytqanda, deputat I.Palvanov tárepinen “Tas jap” máhállesi máhállesinde jasaytuǵın sociallıq qorǵawǵa mútáj shańaraqtıń halınan xabar alınıp, olarǵa ámeliy járdem kórsetildi. Shańaraqtaǵı jas qız – Maloxattıń medicina tarawında bilim alıw ármanın qollap-quwatlaw maqsetinde onıń kontrakt tólemin tólep beriw baslaması alǵa qoyıldı.
Bunday háreketler kámbaǵallıqtı qısqartıw tek ǵana qarjılay járdem menen sheklenbewi, al bilimlendiriw, kásip-óner hám imkaniyatlar arqalı insanlardıń ózin-ózi támiyinlew dárejesin arttırıw zárúr ekenligin kórsetedi.
Juwmaqlap aytqanda, “Xalıq penen birge” ulıwma milliy baǵdarlaması sheńberinde ámelge asırılıp atırǵan jumıslar ÓzLiDePtiń xalıq máplerine xızmet etiw, hár bir puqaranıń turmısında unamlı ózgerisler islewge qaratılǵan háreketleriniń ámeliy kórinisi bolıp esaplanadı. Bul bolsa partiyanıń jámiettegi ornı hám abırayın jáne de bekkemlewge xızmet etedi.
Qaraqalpaqstan xabar agentligi