Mámleketimizde isbilermenlikti rawajlandırıw, ásirese, jaslardı agrar tarawǵa keńnen tartıw mámleketlik siyasattıń tiykarǵı baǵdarlarınan birine aylanbaqta. Bul baǵdarda ÓzLiDeP tárepinen ámelge asırılıp atırǵan “Xalıq penen birge” ulıwma milliy baǵdarlaması sheńberindegi joybarlar ayrıqsha áhmiyetke iye bolmaqta.
Atap aytqanda, Qaraqalpaqstan Respublikası Ámiwdárya rayonındaǵı “Tas jap” máhállesinde jaylasqan «MANGIT INVEST PLYS» bazasında shólkemlestirilgen “Jas fermerler mektebi” mine usınday baslamalardıń ámeliy kórinisi boldı. Bul ilajda partiyanıń aymaqlıq hám rayonlıq Keńesleriniń juwapkerleri, fermerler jámiyetshiliginiń wákilleri, sonday-aq, deputatlar hám jaslar belsene qatnastı.
Joybardıń tiykarǵı maqseti – jas áwladtı zamanagóy bilim hám kónlikpeler menen támiyinlew, olardı awıl xojalıǵınıń aldınǵı usıllarına úyretiw hám ámeliy tájiriybe arqalı bilimlerin bekkemlewden ibarat. Mektep sheńberinde qatnasıwshılar fermerliktiń teoriyalıq tiykarları menen bir qatarda, jerden nátiyjeli paydalanıw, joqarı ónimdarlıqqa erisiw, ónimniń sapasın arttırıw sıyaqlı áhmiyetli baǵdarlarda bilimlerin bayıtpaqta.
Joybar sheńberinde oqıw-sabaqları ótkerilgen “«MANGIT INVEST PLYS» JShJ jumısı qatnasıwshılar ushın áhmiyetli ámeliy tájiriybe deregi bolıp xızmet etti. Sonıń ishinde, 2017-jılı Asaka Bank tárepinen ajıratılǵan 477 mıń AQSh dolları muǵdarındaǵı kredit qarjıları esabınan kárxanada 1 gektar maydanda zamanagóy ıssıxana qurılǵan.
Búgingi kúnge shekem “MANGIT INVEST PLYS» JShJ tárepinen bahası 2 million AQSh dollarınan aslam miywe-ovoщ ónimleri sırtqı bazarlarǵa, sonıń ishinde, Qazaqstan hám basqa da qońsı mámleketlerge eksport etilgen. Bul bolsa aymaqtıń ekonomikasında kárxananıń áhmiyetli orın iyelep atırǵanın kórsetedi. Sonday-aq, bul jumıs valyuta túsimin arttırıw, jańa jumıs orınların jaratıw hám xalıqtıń bántligin támiyinlewge xızmet etpekte.
Házirgi waqıtta kárxanada 25 máhálle xalqı turaqlı jumıs penen támiyinlengen bolıp, olardıń kópshiligin hayal-qızlar quraydı. Máwsimlik jumıslar dáwirinde bolsa jumısshılardıń sanı jáne de kóbeymekte.
Jaslar bul ıssıxananıń jumısı menen jaqınnan tanısıp, onda engizilgen aldınǵı sırt el, atap aytqanda, Qıtay texnologiyaları tiykarında joqarı zúráátli ónimler jetistiriw processlerin ámelde baqladı.
Bul olarǵa zamanagóy agrotexnologiyalardıń abzallıqları, ónimniń sapasın arttırıw hám eksportqa qolaylı óndiristi shólkemlestiriw boyınsha áhmiyetli ámeliy bilim hám kónlikpelerdi iyelew imkaniyatın berdi.
Juwmaq ornında atap ótiw orınlı, Ámiwdárya rayonında jolǵa qoyılǵan “Jas fermerler mektebi” tek ǵana teoriyalıq bilim beriw emes, al jaslardı tikkeley óndiris processlerine tartqan halda olarda ámeliy kónlikpelerdi qáliplestiriwge xızmet etpekte. Eń áhmiyetlisi, bunday baslamalar arqalı jaslarda zamanagóy agrotexnologiyalarǵa qızıǵıwshılıq artıp, olardıń óz imkaniyatlarına bolǵan isenimi bekkemlenbekte. Bul bolsa keleshekte awıl xojalıǵında básekige shıdamlı, bilimli hám intaker kadrlardıń qatarın keńeytiwge tiykar jaratadı.
Qaraqalpaqstan xabar agentligi