Tórtkúl rayonında isbilermenlik subektleriniń jumısın mánzilli úyreniwge, aymaqtıń rawajlanıwı hám xalıqtıń bántligin támiyinlewge qaratılǵan ámeliy ilajlar jańa basqıshqa shıqpaqta.
Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov rayonda sociallıq-ekonomikalıq tarawlarda ámelge asırılıp atırǵan jumıslar hám jańa joybarlar menen tanıstı.
Úyreniwler dawamında “Shadlıq” MPJda xalıqqa sociallıq xızmet kórsetiw kompleksi hám ondaǵı “Mushtariy DSJN” oqıw orayınıń jumısı kózden ótkerildi. Xalıqtıń sociallıq qorǵalıwın kúsheytiw, mámleket tárepinen puqaralarǵa sociallıq xızmet kórsetiw kólemi hám túrlerin keńeytiwde usı komplekstiń áhmiyeti atap ótildi.
Sonday-aq, usı aymaqta 100 mln. sum jeńilletilgen kredit alıp, óz jumısın baslaǵan jas isbilermen Muhayyo Komilovanıń jumısı úyrenildi. Ónimlerdiń túrin diversifikaciyalaw, aymaqlıq bazardan respublika kólemine shıǵıw imkaniyatları haqqında pikirlesildi.
Máhálledegi jumıssız hayal-qızlardıń bántligin támiyinlewde áhmiyetli orın tutatuǵın jumıstı úyge alıp islew tiykarında jumıs penen támiyinlew boyınsha hákim járdemshisine tiyisli usınıslar berildi. Álbette, jumıstı úyge alıp islew ózine tán jumıs túri bolıp, bunda hayal-qızlar óziniń úyinen shıqpaǵan halda islew hám dáramat tabıw imkaniyatına iye boladı.
Bizge málim, trikotaj fabrikaları hayal-qızlardı turaqlı jumıs ornı menen támiyinlew hám materiallıq mápdarlıqtı arttırıwda áhmiyetli orın tutadı. “Gúlistan” MPJ aymaǵındaǵı “Baraka Tekstil Group” JShJ da 200 ge shamalas jergilikli jaslar hám hayal-qızlardıń bántligi támiyinlengen. Ótken 2025-jılı kárxanada 21 mlrd. sumnan aslam ónim islep shıǵarılǵan hám sırt elge 1,7 mln. dollarlıq ónim eksportqa jiberilgen. Joqarǵı Keńes Baslıǵınıń orınbasarı usı jámiyettiń jumısı menen jaqınnan tanıstı.
Bunnan keyin aymaqtaǵı Sport mektebiniń jumısı úyrenilip, jaslardıń shuǵıllanıwı ushın jaratılǵan sharayatlar kózden ótkerildi. “Beruniy” MPJ belsendileri menen ótkerilgen sáwbette bolsa xalıqtıń abadanlıǵın támiyinlew máseleleri dodalandı.
Bunday úyreniwler aymaqlardaǵı “ósiw noqatları”n anıqlaw, isbilermenlerdi qollap-quwatlaw hám xalıqtıń abadanlıǵın támiyinlewge xızmet etedi.
Qaraqalpaqstan xabar agentligi