Prezidentimizdiń jaslar menen bolǵan ushırasıwınan soń hár hápteniń piyshembi kúni Jaslar kúni dep belgilenip, elimizde jaslar menen islesiwdiń pútkilley jańa, nátiyjeli hám mánzilli sisteması qáliplestirilmekte. Bul baslama jaslardıń tek ǵana mashqalaların tıńlaw emes, al olardıń arzıw-niyetlerin júzege shıǵarıw, potencialın tolıq kórsetiwi ushın bekkem tiykar jaratpaqta.
Mine usınday iygilikli ilajlar sheńberinde Qaraqalpaqstan Respublikası Joqarǵı Keńesiniń Baslıǵı Amanbay Orınbaev Nókis rayonındaǵı bir qatar jumıssız hám atalıqqa alınǵan jaslar menen ushırasıw ótkerdi.
Atap ótilgenindey, elimizde jaslardı hár tárepleme qollap-quwatlaw mámleketlik siyasattıń baslı baǵdarlarınıń biri esaplanadı.
Ótkerilgen ushırasıwda bul baǵdarda jaslarǵa jaratılıp atırǵan imkaniyatlar haqqında keń túrde atap ótildi. Sonıń menen birge, mine, usı imkaniyatlardan nátiyjeli paydalanıp, hár qıylı baǵdarlarda joqarı nátiyjelerge erisip atırǵan jaslardıń qatarı barǵan sayın keńeyip atırǵanı ayrıqsha tilge alındı.
Ushırasıw dawamında jaslar belsendilik kórsetip, ózlerin qızıqtırıp atırǵan máseleler, ámelde ushırasıp atırǵan mashqalalar hám alǵa qoyılıp atırǵan usınıs hám baslamaların bildirdi. Atap aytqanda, isbilermenlikti jolǵa qoyıw, jeńilletilgen kreditlerden paydalanıw, kásip-óner úyreniw hám bilimlendiriw tarawına tiyisli máseleler sóz etildi.
Eń áhmiyetlisi, hár bir kóterilgen másele Joqarǵı Keńes baslıǵınıń jeke qadaǵalawına alınıp, taraw juwapkerlerine qısqa múddetlerde unamlı sheshiw boyınsha anıq tapsırmalar berildi.
Qaraqalpaqstan xabar agentligi