Kóksaray rezidenciyasında Prezident Shavkat Mirziyoevtiń qatnasıwında milliy estrada kórkem óneriniń jarqın ǵayratkeri, Ózbekstan xalıq artisti Farrux Zokirovtıń 80 jıllıq tuwılǵan kúni múnásibeti menen saltanatlı ilaj bolıp ótti.
Onda mámleketlik hám jámiyetlik ǵayratkerler, mádeniyat hám kórkem óner ǵayratkerleri, dóretiwshi zıyalılar, “Yalla” ansambliniń aǵzaları hám keń jámiyetshilik wákilleri qatnastı.
Mámleketimiz basshısı shıǵıp sóylep, Farrux Zokirovtı usı qutlı sáne menen qızǵın qutlıqladı, oǵan bekkem densawlıq, shańaraqlıq tınıshlıq hám jańadan-jańa dóretiwshilik tabıslar tiledi.
Atap ótilgenindey, Zokirovlar dinastiyası kóp jıllardan berli milliy muzıka hám qosıqshılıq kórkem ónerimizdiń rawajlanıwına sheksiz úles qosıp kelmekte. Ózbekstan xalıq artisti Karim Zokirov tiykar salǵan kórkem óner mektebi, milliy ózbek estradası tiykarın salıwshılardan biri Botir Zokirovtıń bay dóretiwshilik miyrası xalqımızdıń úlken ruwxıy baylıǵı sıpatında joqarı qádirlenedi.
Pútkil bir shańaraq hám áwladtıń óz ómirin kórkem óner hám mádeniyattıń rawajlanıwına baǵıshlawı dúnyada siyrek ushırasatuǵın hádiyse ekeni ayrıqsha atap ótildi. Farrux Zokirov mine usı ullı dástúrlerdi múnásip dawam ettirip, milliy estrada kórkem ónerin jańa basqıshqa alıp shıqqan kórkem óner ǵayratkeri sıpatında tán alındı.
Ilajda Farrux Zokirov tek ǵana xalqımız emes, al pútkil Oraylıq Aziya, Doslıq Awqamı mámleketleri hám túrkiy xalıqlardıń súyikli kórkem óner ǵayratkeri ekeni atap ótildi. Onıń Ózbekstan hám Qaraqalpaqstan xalıq artisti degen húrmetli ataqlar menen bir qatarda Qazaqstan, Qırǵızstan, Tájikstan, Ázerbayjan, Tatarstan, Bashqurtstan hám Ingushetiya xalıq artisti degen joqarı ataqlarǵa iye bolǵanı kórkem óner ǵayratkeriniń dóretiwshiligine berilgen úlken baha sıpatında atap ótildi.
Búgin Farrux Zokirov degende “Yalla” ansambli, “Yalla” degende bolsa Farrux Zokirov obrazı kóz aldımızda sáwlelenedi. Mine, 55 jıldan berli bul belgili jámáát tek ǵana mámleketimizde emes, al dúnyanıń abıraylı saxnalarında da gózzal qosıqlar aytıp, millionlaǵan ıqlasbentlerdiń mehrine erisip kelmekte. “Yalla” ansambli jámáátlik estrada atqarıwshılıǵın jolǵa qoyıp, elimizdiń kórkem óneri hám mádeniyatı tariyxında pútkilley jańa bet ashtı. Búgin xalqımızdıń bayramları, áhmiyetli ilajları hám qutlı áyyyamların usı ansambl atqarıwındaǵı qosıqlarsız kóz aldımızǵa keltirip bolmaydı.
Ilajda “Yalla” ansambliniń aǵzaları Javlon Twxtaev, Abbos Aliev, Temur Xoliqov hám Igor Xoliqovtıń da kóp jıllıq nátiyjeli jumısı atap ótildi.
Atap ótilgenindey, “Yalla” ansambliniń atqarıwındaǵı 400 den aslam qosıqlardaǵı milliy ruwx hám saz haqıyqıy xalıq kórkem óneriniń úlgisine, milliy mádeniyatımızdıń “altın fondı”na aylanǵan. Yallama yorim”, “Ywl bwlsin”, “Handalak”, “Majnuntol”, “Kelibdi” sıyaqlı qosıqlar, “CHoyxona”, “Sumalak” sıyaqlı shıǵarmalar milliy qádiriyatlarımızdı jırlasa, “Toshkentim onam”, “Uchquduq”, “Shahrisabz” sıyaqlı qosıqlar elimizdiń biytákirar orınların dúnyaǵa keńnen tanıttı.
Mámleketimiz basshısı Farrux Zokirovtıń elimizdiń sociallıq-mádeniy turmısındaǵı belsene qatnasına da ayrıqsha toqtap ótip, onıń júzlegen jaslarǵa ustazlıq etip, olardı úlken saxnalarǵa alıp shıǵıp atırǵanı, “Ovoz” sıyaqlı iri joybarlar arqalı jańa talant ielerine kórkem óner sırların hám saxna mádeniyatın úyretip atırǵanı hámme ushın haqıyqıy ibrat ekenin atap ótti.
Region dóretiwshileri menen jolǵa qoyılǵan birge islesiw xalıqlar arasında ruwxıy kópir wazıypasın atqarıp atırǵanı atap ótildi. Sonday-aq, mámleketimiz Farrux Zokirov sıyaqlı kórkem óner ǵayratkerleriniń xalıqaralıq dóretiwshilik joybarları hám jańa shıǵarmaların bárqulla qollap-quwatlaytuǵını atap ótildi.
Saltanatlı ilajda Farrux Zokirovtıń kóp jıllıq jemisli miyneti, milliy mádeniyatımız hám kórkem ónerimizdi rawajlandırıw jolındaǵı pidayı xızmetlerin múnásip sıylıqlaw maqsetinde Prezident tárepinen ayrıqsha párman hám qararǵa qol qoyılǵanı járiyalandı.
Atap aytqanda, Yashnabad rayonındaǵı 7-sanlı balalar muzıka hám kórkem óner mektebine Farrux Zokirov atı beriledi.
Bul mektepte “Yalla” atındaǵı balalar ansambli, jaslardıń dóretiwshilik laboratoriyası, zamanagóy dawıs hám video jazıw studiyası shólkemlestiriledi. “Ustaz-shákirt” dástúrleri tiykarında estrada baǵdarı boyınsha atqarıwshılıq sheberligi klassları jolǵa qoyıladı, ustaz dóretiwshilerdiń aylıǵına qosımsha ústeme tólenedi. Mektepte ayrıqsha bahalarǵa oqıp atırǵan oqıwshılar ushın qánigelesken kórkem óner hám mádeniyat bilimlendiriw mákemelerine qabıllaw boyınsha ayrıqsha imkaniyatlar jaratıladı. Hár jılı respublikamız aymaqlarınan qábiletli oqıwshılar usı mektepte óz sheberligin arttırıp baradı. Byudjet esabınan qábiletli oqıwshılar ustazları menen birge abıraylı xalıqaralıq tańlawlarǵa jiberiledi hám múnásip xoshametlenedi.
Ilajda bul bilimlendiriw dárgayı elimizdegi eń úlgili orınlardan birine aylanıp, Zokirovlar dinastiyası jaratqan biybaha dóretiwshilik miyrastı keleshek áwladqa jetkeriwge xızmet etetuǵınına isenim bildirildi.
Saltanatlı máresimde Prezidentimiz milliy kórkem ónerimiz hám mádeniyatımızdı rawajlandırıw jolındaǵı kóp jıllıq sheksiz xızmetleri ushın Farrux Zokirovqa “Buyuk xizmatlari uchun” ordenin tapsırdı.
ÓzA