Rossiya Federaciyası Prezidenti Administraciyası basshısınıń birinshi orınbasarı Sergey Kirienko basshılıǵındaǵı delegaciya Tashkent qalasındaǵı “Moskva injenerlik-fizika institutı” milliy izertlew yadro universitetiniń filialına bardı.
Ózbekstan Respublikası Prezidentiniń 2018-jıl 20-iyuldegi “Tashkent qalasında “MIFI” milliy izertlew yadro universiteti” federal mámleketlik avtonom joqarı bilimlendiriw mákemesiniń filialın shólkemlestiriw hám onıń jumısın shólkemlestiriw haqqında”ǵı qararınıń orınlanıwı boyınsha shólkemlestirilgen bul joqarı oqıw ornında búgingi kúnde 250 ge shamalas student dúnya bilimlendiriw standartları tiykarında bilim almaqta.
“MIFI” injenerlik-fizika tarawında qánigelerdi tayarlaw boyınsha dúnyada óz potencialına iye joqarı oqıw ornı ekenin atap ótiw kerek. Universitet yadro bilimlendiriwi hám texnologiyaları boyınsha dúnyada tórtinshi orında turadı.
Delegaciya aǵzaları universitettiń kovorking aymaǵında studentler menen ushırasıp, olardıń keleshektegi rejeleri hám maqsetleri haqqında sáwbetlesti. Bul jerde yadrolıq fizika, energetika, injenerlik hám zamanagóy texnologiyalar tarawlarına baǵdarlanǵan bilimlendiriw sisteması jaslarǵa keń imkaniyatlar beretuǵını atap ótildi.
Bunnan soń miymanlar ushın filial boylap ekskursiya ótkerildi. “Virtual reallıq hám revers injiniring”, “Energoaudit hám energoservis”, “AES analitikalıq trenajyorları” sıyaqlı aldıńǵı injenerlik mektebi laboratoriyalarınıń jumısı menen tanısıw boldı.
Delegaciya wákillerine zamanagóy texnologiyalar tiykarında ámelge asırılıp atırǵan jumıslar haqqında tolıq maǵlıwmat berildi. Sonıń ishinde, energiya nátiyjeliligin arttırıw, resurslardı únemlew hám kárxanalarda energiya tutınıwın tallaw boyınsha ámeliy qollanbalar kórsetildi. Sonday-aq, laboratoriyalar sheńberinde ámelge asırılıp atırǵan innovaciyalıq joybarlar hám startaplar da tanıstırıldı.
Behruz XUDOYBERDIEV,
Nosirjon HAYDAROV (foto), ÓzA