Qaraqalpaqstan Respublikası Mádeniyat ministrligi kóp jıllardan berli óziniń imaratına iye bolmay, hár túrli ministrliklerdiń binasında jumıs alıp baratuǵın edi.
Prezidentimizdiń mádeniyat hám kórkem óner tarawın rawajlandırıwǵa baylanıslı shıǵarǵan arnawlı Párman hám qararları, respublika húkimetiniń atalarsha kórsetken ǵamqorlıǵınıń nátiyjesinde ministrlik óz irgesine iye boldı.
Búgin 15-aprel ― «Mádeniyat hám kórkem óner tarawı xızmetkerleri kúni» múnásibeti menen Nókis qalasında usı jańa imaratınıń ashılıwına arnalǵan ilaj ótkerildi.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı jańa imarattıń paydalanıwǵa tapsırılıwı múnásibeti menen qutlıqladı.
Respublikamız basshısı sońǵı jılları elimizdegi xalıq xojalıǵınıń barlıq tarawları qatarında mádeniyat hám kórkem óner tarawına da ayrıqsha itibar qaratılıp, bul baǵdarda keń kólemli ilajlar ámelge asırılǵanın, ótken qısqa waqıt ishinde mámleketimiz Prezidenti tárepinen tarawǵa baylanıslı bir qatar Párman hám qararlar qabıl etilip, tarawdı ele de rawajlandırıw, mádeniyat mákemeleriniń materiallıq-texnikalıq bazasın bekkemlew, xızmetkerlerdi hár tárepleme qollap-quwatlaw jańa basqıshqa kóterilip atırǵanın ayrıqsha atap ótti.
Mine usınday iygilikli ilajlar qatarında barlıq qolaylıqlarǵa iye jańa imarattıń paydalanıwǵa tapsırılıwı búgingi Mádeniyat hám kórkem óner tarawı xızmetkerleri kúni bayramında taraw xızmetkerlerine úlken sawǵa boldı.
Ótkerilgen ilajda taraw nuranıylarınan Ózbekstan xalıq artisti, Qaraqalpaqstanǵa xızmet kórsetken artist, Berdaq atındaǵı mámleketlik sıylıqtıń laureatı, «Mehnat shuhrati» hám «El-yurt hurmati» ordenleriniń iyesi Najimatdin Ańsatbaev, Qaraqalpaqstan xalıq artisti Biybiraba Ótepbergenovalar shıǵıp sóylep, mádeniyat tarawına qaratılıp atırǵan bunday joqarı itibar hám qollap-quwatlaw ushın mámleketimiz Prezidenti hám respublikamız basshılarına ózleriniń minnetdarshılıqların bildirdi.
Bunnan soń imarat aldına tartılǵan dástúriy lenta kesilip, ilaj qatnasıwshıları jańa imarattaǵı jaratılǵan qolaylı sharayatlar menen jaqınnan tanıstı.
Álbette, bul imarat xalqımızdıń iygiligi jolında, mádeniyat hám kórkem óner tarawı xızmetkerlerine uzaq jıllar dawamında xızmet etedi dep oylaymız.
Sońınan Berdaq atındaǵı Qaraqalpaq mámleketlik akademiyalıq muzıkalı teatrında «Mádeniyat hám kórkem óner tarawı xızmetkerleri kúni» múnásibeti menen saltanatlı bayram keshesi bolıp ótti.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı bayram múnásibeti menen qutlıqladı.
Hár qanday xalıqtıń mádeniyatı menen kórkem ónerine degen húrmet – bul sol xalıqtıń tariyxı, milliyligi, úrp-ádet hám dástúrlerine bolǵan húrmet sanaladı. Sonlıqtan da, búgingi bayram tamırı tereń tariyxqa iye kóp milletli xalqımızdıń, pútkil elimizdiń bayramı, desek aljaspaǵan bolamız. Aytıp ótiw orınlı, sońǵı jılları elimizde húrmetli Prezidentimizdiń basshılıǵında mádeniyat hám kórkem óner tarawın rawajlandırıwǵa, taraw xızmetkerlerine qolaylı sharayatlar jaratıwǵa hám olardıń xızmetlerin múnásip bahalawǵa, xalıqtıń mádeniy dem alıwın mazmunlı shólkemlestiriwge ayrıqsha itibar shólkemlestiriwge ayrıqsha itibar qaratılıp, bul baǵdarda keń kólemli jumıslar ámelge asırılmaqta.
Ótken qısqa dáwir ishinde tarawǵa baylanıslı bir qatar nızam, Párman hám qararlardıń qabıl etilgeni bul baǵdardaǵı ilajlar kólemin jańa basqıshlarǵa kótermekte.
Ótkerilgen saltanatlı ilaj dawamında mine usınday iygilikli jumıslar haqqında keń túrde atap ótildi.
Bayram ilajı koncert baǵdarlaması menen dawam etti.
Qaraqalpaqstan xabar agentligi