Rossiya Federaciyası Prezidenti Administraciyası basshısınıń birinshi orınbasarı Sergey Kirienko Ózbekstanǵa saparın paytaxtımızdaǵı Jeńis parkindegi “Mártlik gimni” esteligine gúl qoyıwdan basladı.
Dáslep miymanlar ulıwma tariyxımız hám onıń jarqın betleri, sonıń ishinde, Ekinshi jer júzilik urıstaǵı jeńisti ayrıqsha húrmet-izzet penen eske alıp, sawash maydanlarında qaharmanlarsha qaytıs bolǵanlardıń esteligine húrmet kórsetti.
Bunnan soń delegaciya aǵzaları kompleks ishinde jaylasqan “Shon-sharaf” muzeyi menen tanısıp, urıs jıllarında xalqımız kórsetken mártlik hám erlik, front artındaǵı miynet pidayılıǵına baǵıshlanǵan ekspoziciyalardı kózden ótkerdi.
Sapar dawamında miymanlarǵa muzeydiń jaylasıwı, onıń qurılıs ideyası hám bul jerde ámelge asırılıp atırǵan ruwxıy-aǵartıwshılıq jumıslar haqqında tolıq maǵlıwmat berildi.
Ózbekstan hám Rossiya arasındaǵı doslıq qatnasıqları, tariyxıy estelikti qásterlep saqlaw hám keleshek áwladtı watansúyiwshilik ruwxında tárbiyalaw baǵdarındaǵı birge islesiw máselelerine ayrıqsha itibar qaratıldı.
S.Kirienko Jeńis parki kompleksiniń ruwxıy áhmiyetin joqarı bahalap, bul jer tek ǵana tariyxıy estelik emes, al jas áwladtı milliy hám ulıwmainsanıylıq qádiriyatlar ruwxında tárbiyalawda áhmiyetli orın iyeleytuǵının atap ótti.
Joqarı mártebeli miyman muzeydiń húrmetli miymanlar kitabına qoltańba qaldırdı.
ÓzA