Áyyemgi hám biytákirar Samarqand jeri jáne bir iri xalıqaralıq ilimiy-aǵartıwshılıq konferenciyaǵa basshılıq etti. Oraylıq Aziya – Evropa Awqamı universitetleri kongresi sheńberinde ótkerilgen ushırasıwlar zamanagóy bilimlendiriw, ilim hám innovaciyalardıń rawajlanıwında úlken áhmiyetke iye boldı.
Bul kongress sheńberinde 50 den aslam óz-ara birge islesiw boyınsha memorandumlarǵa hám shártnamalarǵa qol qoyılıwı rejelestirilgeni onıń keń kólemli ekenin hám strategiyalıq áhmiyetin ayqın kórsetedi.
Ilajda respublikalıq joqarı oqıw orınlarınıń basshıları qatarında Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń direktorı A.Esimbetov ta qatnastı.
“Ózbekstan hám Polsha III rektorlar forumı” sheńberinde alıp barılǵan sóylesiwler unamlı nátiyjeler menen juwmaqlandı. Atap aytqanda, filial menen Polshanıń abıraylı joqarı bilimlendiriw mákemesi ‒ Krakov awıl xojalıǵı universiteti arasında birge islesiw memorandumına qol qoyıldı. Bul kelisim ilimiy integraciya, akademiyalıq mobillik hám innovaciyalıq rawajlanıw baǵdarlarında uzaq múddetli birge islesiwdi jolǵa qoyıwǵa xızmet etedi.
Ushırasıw dawamında tárepler óz-ara sóylesiwde birge islesiw perspektivaların hár tárepleme dodaladı. Ilim hám bilimlendiriw integraciyasın tereńlestiriw, zamanagóy innovaciyalıq qatnasıqlardı keńnen engiziw hám básekige shıdamlı kadrlar tayarlaw máseleleri dodalawdıń tiykarǵı baǵdarlarına aylandı.
– Bul universitet Evropa ilimiy-bilimlendiriw mákanında ózine tán orın iyelegen, ilimiy izertlewler hám innovaciyalıq qollanbalardı izbe-iz rawajlandırıp atırǵan abıraylı ilimiy oraylardan biri bolıp esaplanadı. Tárepler arasında erisilgen kelisimler sheńberinde Erazmus+ baǵdarlamaları tiykarında birgeliktegi joybarlardı ámelge asırıw boyınsha da anıq baǵdarlar belgilendi, – deydi filial direktorı A.Esimbetov.
Bul birge islesiw student hám professor-oqıtıwshılardıń xalıqaralıq bilimlendiriw mákanına úylesimli integraciyalasıwın támiyinlew, ilimiy potencialdı arttırıw jáne zamanagóy bilim hám kónlikpelerdi ielew ushın keń imkaniyatlar jaratadı.
Á.Jiyemuratov,
Qaraqalpaqstan xabar agentligi