Ózbekstan Respublikası Prezidenti
Ullı Mártebeli Mırza Shavkat Mirziyoevqa
Qádirli Shavkat Miromonovich!
Tek ǵana Oraylıq Aziya emes, al pútkil dúnya civilizaciyasınıń dúrdanaları bolǵan áyyemgi Buxara qalasına ámeliy saparım waqtında kórsetken ayrıqsha miymandoslıq ushın sizge shın júrekten minnetdarshılıq bildiremen.
Ózbekstan bul biybaha baylıqtı qásterlep-saqlap, bayıtıp, ullı ótmishti zamanagóy talaplar menen úylestirip kiyatırǵanı meni tań qaldırdı. Buxaranıń búgingi gózzal kelbeti Siziń Jańa Ózbekstandı qurıwǵa qaratılǵan aqılǵa uǵras hám dóretiwshilik siyasatıńızdıń joqarı nátiyjeliliginiń ayqın kórinisi bolıp tabıladı.
Tereń oylanǵan ilajlarǵa bay sapar etiwdiń ózi, álbette, paydalı boldı. Buxaradaǵı bir kúnlik sóylesiwler uzaq múddetli siyasiy nátiyjesi jaǵınan rásmiy sapar etiwden hesh qalıspaydı, degen pikirdemen.
Ushırasıwımız Qazaqstan hám Ózbekstan arasındaǵı kóp qırlı baylanıslardı jáne de bekkemlew ushın jańa gorizontlardı ashtı, mámleketleraralıq strategiyalıq birge islesiwdi jańa mazmun menen bayıtıwǵa xızmet etedi.
Astanaǵa qaytqan soń, erisilgen hám tastıyıqlanǵan kelisimlerdi ámelge asırıw, sonday-aq, elińizdiń hár qıylı tarawlardaǵı paydalı tájiriybesin esapqa alıw boyınsha anıq tapsırmalar berdim. “Taza hawa” birgeliktegi baslamasına ayrıqsha áhmiyet beremen.
Isenimim kámil, biz qoyǵan wazıypalardıń sapalı orınlanıwı Qazaqstan – Ózbekstan strategiyalıq sherikligin hám awqamlaslıǵın jańa sheklerge alıp shıǵıwǵa xızmet etedi.
Qazaqstan ushın úlken mádeniy hám tariyxıy áhmiyetke iye bolǵan arxiv materialların usınǵanıńız ushın ayrıqsha minnetdarshılıq bildiremen. Bul háreket Siziń keńpeyilligińiz hám qazaq xalqına bolǵan jıllı kózqarasıńız, tuwısqan mámleketlerimiz tariyxın múnásip tán alǵanıńızdan derek beredi.
Húrmetli Shavkat Miromonovich! Sizge hám shańaraǵıńızǵa shın kewlimnen bekkem densawlıq hám baxıt-ıǵbal, Qazaqstannıń máńgi dostı, awqamlası hám strategiyalıq sherigi bolǵan Jańa Ózbekstandı qurıwda jańa tabıslar tileymen.
Húrmet penen,
Qasım-Jomart TOQAEV,
Qazaqstan Respublikası Prezidenti