Prezident Shavkat Mirziyoevqa neft-gaz tarmaǵında turaqlı óndiris kórsetkishlerin támiyinlew hám finanslıq-ekonomikalıq nátiyjelilikti arttırıw boyınsha ámelge asırılıp atırǵan ilajlar haqqında esabat berildi.
“Ózbekneftgaz” akcionerlik jámiyeti sistemasında usı jıldıń birinshi shereginiń juwmaqları, ekinshi sherektegi tiykarǵı wazıypalar, óndirislik hám finanslıq kórsetkishlerdiń dinamikası kórip shıǵıldı.
Tarmaqta qazıp shıǵarıw kólemlerin turaqlılastırıw, bar joǵaltıwlardı qaplaw, qudıqlardı iske qosıw, ońlaw hám texnologiyalıq ilajlar izbe-izlik penen alıp barılmaqta. Sonıń menen birge, qárejetlerdi optimallastırıw, debitor qarızdarlıqtı qısqartıw, resurslardan nátiyjeli paydalanıw hám ayırım baǵdarlarda bazar mexanizmlerin jetilistiriw boyınsha jumıs alıp barılmaqta.
Qudıqlardıń nátiyjeliligin arttırıw hám qazıp shıǵarıwǵa zamanagóy texnologiyalardı engiziw máselesine ayrıqsha itibar qaratıldı. Bul baǵdarda xalıqaralıq kompaniyalar menen birgelikte bir qatar texnologiyalıq sheshimler úyrenip atırǵanı hám olardı basqıshpa-basqısh ámeliyatqa engiziw názerde tutılıp atırǵanı atap ótildi.
Geologiyalıq-izlew jumısların keńeytiw, jańa perspektivalı maydanlardı anıqlaw hám olardı ózlestiriw boyınsha alıp barılıp atırǵan jumıslar haqqında da málimleme berildi.
Sonıń ishinde, 2D hám 3D seysmorazvedka izertlewleriniń kólemin arttırıw, jańa maydanlarda burawlaw jumısların baslaw, burawlaw baǵdarlamaların xalıqaralıq talaplar tiykarında shólkemlestiriw, sonday-aq, supervayzing, geologiyalıq-gidrodinamikalıq modellestiriw hám joybarlaw processlerin bunnan bılay da jetilistiriw ilajları kórilmekte. Atap ótilgenindey, usı jılı bir qatar jańa maydanlarda jumıs baslanǵan bolıp, keyingi basqıshlarda bul jumıslar jáne de keńeytiledi.
Orta múddetli baǵdarlamalar sheńberinde qıyın ózlestiriletuǵın rezervlerde islew, tereń hám quramalı qudıqlardı burǵılawda aldınǵı sırt el tájiriybesin tartıw áhmiyetli ekenligi atap ótildi.
Mámleketimiz basshısı neft-gaz tarmaǵında óndiris turaqlılıǵın támiyinlew, bar quwatlıqlardan únemli paydalanıw, geologiyalıq-izlew, burawlaw hám ońlaw jumısların sistemalı tiykarda shólkemlestiriw, finanslıq tártipti bekkemlew boyınsha tiyisli tapsırmalar berdi.
ÓzA