Qádirli doslar!
Bárinen burın, siz, ázizlerdi, sizlerdiń tımsalıńızda pútkil kórkem ónerdi súyiwshi xalqımızdı 15-aprel – Mádeniyat hám kórkem óner tarawı xızmetkerleri kúni menen shın kewlimnen qutlıqlayman.
Usı qutlı áyyyamda óziniń biytákirar talantı, bilim hám sheberligi menen el-jurtımızǵa shın kewilden xızmet etip kiyatırǵan kórkem óner sheberleri hám jas atqarıwshılarǵa, barlıq taraw xızmetkerlerine pidákerlik miyneti ushın shın júrekten minnetdarshılıq bildiremiz.
Sońǵı jılları elimizde barlıq tarawlar qatarında mádeniyat hám kórkem óner sistemasın zamanagóy talaplar tiykarında rawajlandırıw boyınsha da keń kólemli reformalar ámelge asırılmaqta. Nátiyjede tarawdıń materiallıq-texnikalıq bazası, kadrlar potencialı bekkemlenip, xızmetkerlerdiń dóretiwshilik miyneti múnásip xoshametlenbekte. Teatr, kino, muzey hám mádeniy ilajlar, xalıqqa kórsetilip atırǵan xızmetlerdiń sapası izbe-iz jaqsılanbaqta.
Zamanagóy basqarıw mexanizmleri engizilip, mámleketlik-jeke menshik sheriklik tiykarında jańa dóretiwshilik joybarlar, sanlı texnologiyalar hám aldınǵı tájiriybeler ámeliyatqa engizilip atırǵanı, mádeniy kontent jaratıw kólemi keńeyip atırǵanı mádeniyat mákemeleriniń jumısında nátiyjelilik hám tartımlılıqtı bunnan bılay da arttırıwǵa xızmet etpekte.
Sońǵı jılları elimizde 2 teatr, 19 mádeniyat orayı, 16 muzey, 20 muzıka hám kórkem óner mektebi jáne usı baǵdarda 5 joqarı oqıw ornı shólkemlestirildi, kóplegen mákemeler zamanagóy úskeneler menen támiyinlendi, 125 tariyxıy-mádeniy miyras obektinde olardı saqlaw hám tiklew boyınsha zárúr jumıslar ámelge asırıldı.
Ótken jılı súwretlew hám ámeliy kórkem óner tarawın bunnan bılay da rawajlandırıw boyınsha ayrıqsha qarar qabıl ettik. Tashkent qalasında Ózbekstan Milliy muzeyi imaratınıń qurılısı baslandı. Bıyıl bolsa Oraylıq kórgizbeler zalı, Kórkem kórgizbeler direkciyası fondınıń imaratı, Pavel Benkov atındaǵı súwretlew mektebinde qurılıs hám ońlaw jumısları alıp barıladı, taraw xızmetkerlerin qollap-quwatlaw boyınsha zárúr ilajlar kóriledi.
Jáne bir áhmiyetli process – ózbek mádeniy diplomatiyası izbe-iz rawajlanbaqta. Abıraylı xalıqaralıq forumlar, tańlawlar, festivallar hám mádeniyat kúnleri turaqlı ótkerilip kelinbekte. Atap aytqanda, ótken jılı Samarqand qalasında YuNESKO Bas konferenciyasınıń sessiyası, Buxarada Birinshi xalıqaralıq zamanagóy kórkem óner biennalesi, Nókiste Aral mádeniyatı sammiti, Xorezmde Túrkiy dúnya mádeniyat forumı, Tashkentte bolsa Oraylıq Aziya hám Ázerbayjan mádeniyat ministrleriniń birinshi ushırasıwı joqarı dárejede shólkemlestirildi.
Eń áhmiyetlisi, Watanımızdıń kórkem óner tarawında xalıqaralıq processlerdegi qatnasıwı keńeyip, abırayı artıp barmaqta.
Ózbekstanlı kórkem óner sheberleriniń Evropadaǵı abıraylı mádeniyat orınlarındaǵı shıǵıwları sırt elli kórkem óner ıqlasbentlerinde úlken qızıǵıwshılıq oyatpaqta. Bul haqqında sóz bolǵanda, Avstriyanıń Zalcburg qalasındaǵı Grosses Festspielhaus saxnasında Ózbekstan Milliy baleti toparı tárepinen “Lázgi. Muhabbat hám qálb ayaq oyını” baleti kórsetilgenin atap ótiw kerek.
Usı jıl 9-aprelde jáne bir iri kórkem óner dárgayı – Musikverein saxnasında Sahıpqıran Ámir Temur babamızdıń 690 jıllıq tuwılǵan kúnine baǵıshlanǵan muzıkalı opera shıǵarmasınıń prezentaciyası ótkerildi.
Milliy kino kórkem ónerimizdi rawajlandırıw, atap aytqanda, “Tiri tariyx” dúrkiminde ideyalıq hám kórkemlik jaqtan joqarı shıǵarmalar dóretiw baǵdarındaǵı jumıslar dáslepki nátiyjelerin bermekte. Ótken jılı mámleketlik buyırtpa tiykarında 123 kinofilm tayarlanıp, tamashagóyler itibarına usınıldı.
Ótken jıldıń ózinde tarawda uzaq jıllardan berli miynet etip kiyatırǵan 35 xızmetker turaq jay menen támiyinlendi. Mádeniyat mákemeleri xızmetkerleriniń miynet haqısı ortasha 35 procentke arttırıldı. Dramaturgler ushın Mahmudxwja Behbudiy, jas rejissyorlar ushın Bahodir Ywldoshev, jas qosıqshılar ushın Botir Zokirov atındaǵı sıylıqlar jáne jergilikli hám sırt el dóretiwshileri ushın “Kelajak merosi” xalıqaralıq sıylıǵı tapsırılıp kelinbekte.
Húrmetli watanlaslar!
Búgingi kúnde mádeniyat hám kórkem óner tarawın ruwxıy tárbiya quralı hám kreativ ekonomikanıń áhmiyetli tarmaǵı sıpatında rawajlandırıw, dóretiwshilik industriyanı qollap-quwatlaw, mádeniy xızmetler bazarın rawajlandırıw, kórkem óner ónimleriniń eksportın keńeytiw áhmiyetli wazıypa bolıp qalmaqta. Jańadan shólkemlestirilip atırǵan Kreativ industriya parki mine usı maqsetlerge xızmet etedi. Biz bul baǵdarda úlken shek alıp, 2030-jılǵa shekem kreativ ekonomikanıń jalpı ishki ónimdegi úlesin 5 procentke jetkeremiz.
Álbette, bul úlken reje hám baslamalardı ámelge asırıwda siz, jankúyer hám pidayı insanlardıń ornı sheksiz. Sizlerdiń bilim, tájiriybeńiz hám dóretiwshilik potencialıńız milliy mádeniyatımızdı jańa basqıshqa alıp shıǵatuǵınına isenemen.
Biz bunnan bılay da tarawdı hár tárepleme qollap-quwatlaw, dóretiwshilik hám texnikalıq xızmetkerlerdiń miynetin múnásip qádirlewge tiykarǵı áhmiyet qaratamız.
Sizlerdi búgingi kásiplik bayramıńız benen jáne bir márte qızǵın qutlıqlap, bársheńizge bekkem densawlıq, baxıt-ıǵbal, jańa dóretiwshilik jetiskenlikler, shańaraqlarıńızǵa tınıshlıq hám qut-bereket tileymen.
Shavkat MIRZIYoEV
Ózbekstan Respublikası Prezidenti