Qaraqalpaqstan Respublikası Densawlıqtı saqlaw ministrligi tárepinen medicina xızmetkerleriniń huqıqın qorǵawdı bekkemlew, nızamshılıqtı támiyinlew hám korrupciyanıń aldın alıw máselelerine baǵıshlanǵan ilajlar turaqlı túrde ótkerilmekte.
Usınday ilajlardan biri Nókis qalalıq medicina birlespesinde shólkemlestirildi.
Ilajdı birlespeniń bas shıpakeri I.Palwanov kiris sóz benen ashıp, densawlıqtı saqlaw tarawında nızambuzıwshılıqlardı, ásirese, korrupciyalıq háreketlerdiń aldın alıw oǵada áhmiyetli ekenligin atap ótti.
Bunnan soń Densawlıqtı saqlaw ministrligine qaraslı korrupciyaǵa qarsı ishki qadaǵalaw bóliminiń Qaraqalpaqstan Respublikası boyınsha bas qánigesi R. Nurımbetov medicina sistemasındaǵı búgingi jaǵday boyınsha bayanat jasadı.
― Korrupciyanıń hár qanday kórinisi tarawdıń rawajlanıwına úlken tosqınlıq bolıp esaplanadı. Sol sebepli bul illetke qarsı keskin ilajlar kórilip kelinbekte. Respublikamızda da házirgi waqıtta oǵan qarsı mawasasız gúres alıp barılmaqta, ―dedi bayanatshı óz sózinde. ― Biraq, tilekke qarsı ele kútilgen nátiyjege erisilgeni joq. Ayırım emlew-profilaktika mákemelerinde nızambuzıwshılıqlar ushırasıp atır. Xızmetkerlerdiń huqıqıy sawatlılıǵın arttırıw, sistemada nızam ústinligin támiyinlew zárúr. Keleshekte bul baǵdardaǵı profilaktikalıq, úgit-násiyatlaw jumısları jáne de kúsheytiledi. Medicinanı korrupciyadan jıraq tarawǵa aylandırıwǵa qaratılǵan háreketler turaqlı dawam etedi.Ilaj sońında qatnasıwshılarǵa Densawlıqtı saqlaw ministrligi sistemasında bul illetke qarsı kórilip atırǵan ilajlarǵa baylanıslı videofilm kórsetildi.
Qaraqalpaqstan xabar agentligi