Máhálle turmısında hákim járdemshileriniń atqaratuǵın xızmeti ayrıqsha. Qaraqalpaqstan Respublikasındaǵı jumıs alıp barıp atırǵan hákim járdemshileriniń Ándijan wálayatında bolıp turǵanı haqqında xabar bergen edik. Házirgi waqıtta olar Namangan wálayatında bolıp ol jerdegi máhálleler turmısı menen tanıspaqta.
Hákim járdemshileriniń qatnasıwındaǵı ámeliy seminar “Pal hárreshiler” máhállesinen baslandı.
Wálayattaǵı Davlatabad rayonındaǵı “Gulobod” mákan puqaralar jıyınında jámi 631 shańaraq bolıp, sonnan 180 shańaraq pal hárreshilik penen shuǵıllanadı. Ótken jılı máhállede 200 tonna pal jetistirilgen bolsa, usı máwsimde bul kórsetkishti 250 tonnaǵa jetkeriw rejelestirilgen.
Bul baǵdarda máhállede 635 xalıq turaqlı jumıs ornı menen támiyinlengen.
Búgingi kúnde Namangan wálayatında bolıp turǵan Qaraqalpaqstan Respublikası máhállelerinde jumıs alıp barıp atırǵan hákim járdemshileri usı máhállede bolıp, óz-ara tájiriybe almastı.
Ilajdan gózlengen tiykarǵı maqset birge islesiw arqalı aymaqlarda jańa ekonomikalıq drayverlerdi qáliplestiriw, xalıqtıń bántligin támiyinlew hám dáramatların arttırıwdan ibarat.
Wálayattaǵı “Tómengi shóje” MPJ turǵınları diyqanshılıq tájiriybesin puqta iyelegeni bolıp, máhállede jasawshı Dilorom óziniń 2 sotıx qıytaq jerinde gidroponika usılında qulpınay jetistirmekte. Ol seminar qatnasıwshılarına óz tájiriybesi haqqında aytıp berip, búgingi kúnde Qaraqalpaqstanǵa da qulpınay nállerin jetkerip berip atırǵanlıǵın atap ótken.
Dilorom qısqa waqıt ishinde nátiyjege erisip, tek ǵana 5 ay ishinde 50 million sumlıq ónim satıwǵa erisken.
Seminar qatnasıwshıları aymaqtıń klimatına say sharayatlar hám resurslardıń jeterliligi sonday-aq, qıytaq jerlerden únemli paydalanıw joqarı ónimdarlıqqa erisiw imkaniyatın berip atırǵanınlıǵınıń gúwası boldı.

Máhállede házirgi waqıtta “Bir kontur bir ónim” principi tiykarında 200 gektar jer ajıratılǵan bolıp, onda tiykarınan kartoshka hám qulpınay jetistiriw baǵdarları rawajlandırılıp, aymaq ekonomikasınıń áhmiyetli drayverine aylanbaqta.
Bunday tájiriybe almasıwlar hákim járdemshileri ushın respublikamızdaǵı máhállelerde jańalıqlardıń egiziliwine hám xalıqtıń turmıs shárayatınıń jaqsılanıwına tiykar boları anıq.
Qaraqalpaqstan xabar agentligi