Áyne payıtta Samarqand qalasında Ózbekstanda Oraylıq Aziya hám Evropa Awqamı mámleketlerinen jetekshi joqarı bilimlendiriw mákemeleri jáne aldınǵı texnologiyalıq kompaniyalardıń qatnasıwında iri xalıqaralıq ilajlar “Medicina hám texnologiyalar kongresi” jáne “Ózbekstan hám Polsha III – Rektorlar forumı” bolıp ótpekte. Bul ilajlar ilim, bilimlendiriw hám innovaciyalar tarawında xalıqaralıq birge islesiwdi rawajlandırıw, tájiriybe almasıw hám jańa joybarlardı jolǵa qoyıw ushın áhmiyetli maydan wazıypasın atqarmaqta.
Bul forumda Berdaq atındaǵı Qaraqalpaq mámleketlik universiteti rektorı Berdiyar Jollıbekov basshılıǵındaǵı universitet delegaciyası da belsene qatnaspaqta. Forum sheńberinde universitet rektorı sırt el joqarı bilimlendiriw mákemeleri, ilimiy oraylar hám texnologiyalıq kompaniyalar menen ushırasıwlar ótkerip, óz-ara paydalı birge islesiw baylanısların keńeytiw boyınsha sóylesiwler alıp barmaqta.
Sonday-aq, sırt elli birge islesiwshiler menen bilimlendiriw hám ilimiy izertlewler tarawında qospa baǵdarlamalardı jolǵa qoyıw, akademiyalıq almasıwdı rawajlandırıw, innovaciyalıq joybarlardı ámelge asırıw hám zamanagóy texnologiyalardı bilimlendiriw procesine engiziw máselelerine ayrıqsha itibar qaratılmaqta. Sóylesiwler nátiyjesinde bir qatar perspektivalı kelisimler hám birge islesiw shártnamalar dúzilmekte. Bul kelisimler universitettiń xalıqaralıq abırayın jáne de bekkemlewge xızmet etedi.
Qaraqalpaqstan xabar agentligi