Nókis qalasında «Salamat denede – sapalı medicina» súreni astında medicina xızmetkerleri arasında sporttıń kishi futbol, voleybol, stol tennisi, shaxmat hám shashka túrlerinen Ózbekstan kásiplik awqamları Federaciyası kubogi jarısları ótkerildi.
Sport jarıslarınıń ashılıw máresimine Qaraqalpaqstan Respublikası densawlıqtı saqlaw ministriniń orınbasarı B.Alimbetov, Ózbekstan Densawlıqtı saqlaw xızmetkerleri kásiplik awqamınıń Qaraqalpaqstan Respublikası keńesi baslıǵı L.Baybosınovalar shıǵıp sóylep, jarıs qatnasıwshılarına tabıslar tiledi.
Oǵada qızıqlı ótken jarıslarda kishi futbol boyınsha Respublikalıq qıstawlı medicinalıq járdem orayı Qaraqalpaqstan filialı komandası birinshi orındı iyelegen bolsa, voleybol boyınsha erler hám hayal-qızlar arasında Qaraqalpaqstan medicina institutı komandası kubok jeńimpazına aylandı.
Stol tennisinde bolsa, hayal-qızlar hám erler arasında da Respublikalıq qıstawlı medicinalıq járdem orayı Qaraqalpaqstan filialı xızmetkerlerine teń keletuǵın tennisshiler tabılmadı.
Shaxmat boyınsha ótkerilgen bellesiwlerde hayal-qızlar arasında Respublikalıq qánigelestirilgen ruwxıy salamatlıq ilimiy-ámeliy medicina orayının psixologiya xızmeti boyınsha Qaraqalpaqstan filialı, erler arasında Xojeli Ábiw Áliy Ibn Sino atındaǵı jámiyet salamatlıǵı texnikumı, shashka boyınsha erler arasında 2-sanlı Respublikalıq ftiziatriya emlewxanası, hayal-qızlar arasında Respublikalıq qánigelestirilgen ruwxıy salamatlıq ilimiy-ámeliy medicina orayının psixologiya xızmeti boyınsha Qaraqalpaqstan filialı xızmetkerleri jeńip aldı.
Ótkerilgen sort jarısları sońında jeńimpazlar shólkemlestiriwshiler tárepinen tayarlanǵan arnawlı diplom hám estelik sawǵalar menen sıylıqlandı.
Adilbay Orazov,
Qaraqalpaqstan xabar agentligi sholıwshısı.