Prezident Shavkat Mirziyoev 13-aprel kúni isbilermenlik subektlerine finanslıq járiymalardı qollanıw tártibin bunnan bılay da liberallastırıw, bul baǵdarda artıqsha byurokratiyalıq tosqınlıqlardı qısqartıw jáne mámleketlik uyımlar hám lawazımlı shaxslardıń jumısı ústinen sud qadaǵalawınıń nátiyjeliligin arttırıwǵa qaratılǵan usınıslardıń prezentaciyası menen tanıstı.
Prezentaciyada búgingi kúnde finanslıq járiymalardı qollanıw ámeliyatında isbilermenler ushın bir qatar mashqalalar saqlanıp qalıp atırǵanı atap ótildi. Atap aytqanda, házirgi waqıtta járiymalardıń kópshiligi wákillikli uyımlar, qalǵanları bolsa sudlar tárepinen qollanılıp atırǵanı sud qadaǵalawın kúsheytiw zárúrligin kórsetpekte.
Usı múnásibet penen bıyıl 1-oktyabrden finanslıq járiymalardı ıqtıyarlı tólewdi xoshametlewshi jańa hám birden-bir tártipti engiziw usınıs etildi. Oǵan bola, isbilermenlik subekti wákillikli uyımnıń qararı tapsırılǵan kúnnen baslap bir ay ishinde járiymanıń 50 procentin tólese, qalǵan bólegin tólewden azat etiledi.
Sonday-aq, járiymanı altı ay dawamında teń bólip tólew imkaniyatın jaratıw názerde tutılmaqta. Onda qarar tapsırılǵannan soń bir ay ishinde járiyma summasınıń altıdan bir bólegi tólense, bul tártip avtomat túrde ámel etedi.
Sud qadaǵalawın kúsheytiw maqsetinde wákillikli uyımnıń finanslıq járiyma qollanıw haqqındaǵı qararı sud tárepinen biykar etilgen yamasa haqıyqıy emes dep tabılǵan jaǵdayda óndirilgen qarjılardı 15 kún múddette qaytarıw mexanizmin belgilew usınıs etildi. Eger bul múddet buzılsa, keshiktirilgen hár bir kalendar kún ushın Oraylıq banktiń tiykarǵı stavkasınan kelip shıqqan halda procent esaplanıwı názerde tutılmaqta.
Finanslıq járiymalardı qollanıw processlerin sanlastırıwǵa da ayrıqsha itibar qaratıldı. Biznes-ombudsman tárepinen júrgiziletuǵın “Birden-bir mámleketlik qadaǵalaw” málimleme sistemasında isbilermenlik subektlerine qollanılǵan finanslıq járiymalardıń elektron reestrin engiziw usınıs etildi.
Wákillikli uyımlardıń qararları qabıl etilgennen keyin elektron sanlı qoltańba menen usı sistemaǵa kirgiziliwi shárt boladı. Málimleme sistemasına kirgizilmegen hám elektron sanlı qoltańba menen tastıyıqlanbaǵan qararlar haqıyqıy emes dep esaplanadı hám olar tiykarında járiyma óndirilmeydi.
Sonday-aq, mobil qosımsha arqalı finanslıq járiymalardı esapqa alıw, olardı monitoring etiw hám onlayn tólew imkaniyatın jaratıw, mápdar uyımlardıń málimleme sistemaların óz-ara integraciyalaw zárúr ekenligi atap ótildi. Salıq tólewshi – isbilermenlik subektiniń jeke kabineti arqalı finanslıq járiyma haqqındaǵı qararlar ústinen onlayn shaǵım etiw hám shaǵım kirgiziliwi menen qarardıń orınlanıwın avtomat toqtatıp turıw imkaniyatın engiziw názerde tutılmaqta.
Prezentaciyada huqıqıy tásir ilajların qollanıw tártibin unifikaciyalawǵa qaratılǵan “Huqıqıy tásir ilajları haqqında”ǵı nızam joybarın islep shıǵıw usınısı bildirildi.
Mámleketimiz basshısı isbilermenlik subektleriniń huqıqları menen nızamlı máplerin isenimli qorǵaw, olardı nızamǵa ámel etken halda jumıs alıp barıwǵa xoshametlew, járiyma qollanıw ámeliyatında ádillik hám ashıq-aydınlıqtı támiyinlew eń áhmiyetli wazıypalardan ekenin atap ótti.
Usınıslardı puqta islep shıǵıp, sud qadaǵalawın kúsheytiw, sanlastırıwdı jedellestiriw hám tarawda birden-bir, anıq hám ádil huqıqıy mexanizmdi qáliplestiriw boyınsha juwapkerlerge tiyisli tapsırmalar berildi.
ÓzA