Isbilermenlikke kómeklesiw búgingi kúnde ekonomikamızdıń rawajlanıwına salmaqlı úles qosıwı menen birge, jańa jumıs orınların jaratıwda da áhmiyetli esaplanadı. Olardıń jumısların qollap-quwatlawda bolsa, tikkeley jaqınnan pikirlesiw arqalı mashqalalarına sheshim tabıw búgingi kúnniń talabı ekenligin ayrıqsha aytıwımız kerek.
Usı baǵdardaǵı ámeliy jumıslardıń dawamı sıpatında Joqarǵı Keńes Baslıǵı Amanbay Orınbaevtıń basshılıǵında sanaat tarawında jumıs alıp barıp atırǵan isbilermenler menen ushırasıw bolıp ótti.
Onda Prezidentimiz tárepinen sanaattı rawajlandırıw, isbilermenlikti qollap-quwatlaw, investiciyalıq joybarlardı ámelge asırıw baǵdarındaǵı Qaraqalpaqstan ushın óz aldına berilgen jeńillikler keń túrde atap ótildi.
Sonıń menen birge, berilgen sonsha imkaniyatlardan nátiyjeli paydalanıp, elimizdiń sanaat potencialın arttırıw, tarawda jańa kárxanalardı iske qosıw, import arqalı alıp kelinip atırǵan ónimlerdi islep shıǵarıwdı shólkemlestiriw, jergilikli kárxanalardıń bar bolǵan imkaniyatlarınan nátiyjeli paydalanıp, óz-ara birge islesiwdi jolǵa qoyıw máseleleri sóz etildi.
Bunnan tısqarı, juwapker mákeme basshıları tárepinen salıq, bajıxana hám basqa da baǵdarlar boyınsha berilgen jeńillikler paketi keń túrde tanıstırıldı.
Qaraqalpaqstan xabar agentligi