Usı jıldıń 12-aprel kúni Xojeli rayonında 37-sanlı «Xojeli» saylaw okrugine bosap qalǵan orınǵa Qaraqalpaqstan Respublikası Joqarǵı Keńesiniń deputat saylaw ótkeriliwi belgilengen. Usı múnásibet penen tiyisli uchastkalıq saylaw komissiyalarınıń aǵzaları ushın oqıw-seminarı shólkemlestirildi.

Oqıw-seminar Ózbekstan Respublikası Oraylıq saylaw komissiyasınıń 2024-jıl 27-may kúni qabıl etilgen “Saylaw komissiyaları aǵzalarınıń bilim hám kónlikpelerin arttırıwdı shólkemlestiriw haqqında”ǵı 1331-sanlı qararına tiykarlanǵan bolıp, seminar dawamında komissiya aǵzalarına saylawlarǵa tayarlıq kóriw hám olardı ótkeriw boyınsha tártip qaǵıydalar tuwralı keń túrde túsinikler berildi.

Atap aytqanda, Xojeli rayonı hákiminiń orınbasarı X.Xalmuratov, hákimliktiń shólkemlestiriwshi-kadrlar toparınıń basshısı D.Tadjimuratov, Qaraqalpaq mámleketlik universitetiniń professor-oqıtıwshıları A.Jumanov hám E.Allambergenovlar Ózbekstan Respublikasınıń «Saylaw kodeksi»ne muwapıq, saylawǵa tayarlıq kóriw hám onı ótkeriwge baylanıslı norma, qaǵıydalar menen komissiya aǵzaların tanıstırdı.

Sonday-aq, seminarda shıǵıp sóylegenler áhmiyetli siyasiy ilajdı saylaw nızamshılıǵı talapları tiykarında joqarı dárejede ótkeriw boyınsha óz pikirlerin bildirdi.

Qaraqalpaqstan xabar agentligi.