Ózbekstan Respublikası Prezidenti Shavkat Mirziyoev Buxara qalasına jónep ketti.
Erteń, 11-aprel kúni Qazaqstan Respublikası Prezidenti Qasım-Jomart Toqaev ámeliy sapar menen mámleketimizde boladı.
Sapar etiw sheńberinde Buxarada joqarı dárejedegi sóylesiwler bolıp ótedi. Onda Ózbekstan – Qazaqstan doslıq, strategiyalıq sheriklik hám awqamlaslıq qatnasıqların jáne de rawajlandırıw máseleleri kórip shıǵıladı. Siyasiy sóylesiwdi, parlamentleraralıq, húkimetleraralıq hám aymaqlararalıq baylanıslardı bekkemlewge ayrıqsha itibar qaratıladı.
Sonday-aq, jetekshiler tovar almasıw kólemin arttırıw, sanaat kooperaciyasın tereńlestiriw, transport, energetika, suw hám ekologiya tarawlarında birgeliktegi joybarlar menen baǵdarlamalardı alǵa qoyıw hám mádeniy-gumanitarlıq almasıwdı jedellestiriw máselelerin dodalaydı.
Xalıqaralıq hám regionallıq kún tártibindegi máseleler boyınsha da pikir alısıladı.
Birgelikte tariyxıy esteliklerdi zıyarat etiw, sanaat kárxanalarınıń jumısı hám ónimleriniń kórgizbesi menen tanısıw rejelestirilgen.
Búgin bolsa mámleketimiz basshısı Buxara wálayatın sociallıq-ekonomikalıq rawajlandırıw boyınsha ámelge asırılıp atırǵan jumıslar hám perspektivalı joybarlar menen tanısadı.
ÓzA