Berdaq atındaǵı Qaraqalpaq mámleketlik akademiyalıq muzıkalı teatrında 9-aprel – Qaraqalpaqstan Respublikası Konstituciyası qabıl etilgeniniń 33 jıllıq sánesine arnalǵan bayram saltanatı bolıp ótti.
Ilajǵa Joqarǵı Keńes deputatları, ministrlikler, mákemeler, kárxanalar, oqıw orınları hám huqıq qorǵaw uyımlarınıń basshıları, student-jaslar, jámiyetlik shólkemlerdiń, ǵalaba xabar qurallarınıń wákilleri qatnastı.
Saltanatlı ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı.
Qaraqalpaqstan Respublikası Joqarǵı Keńesiniń Baslıǵı Amanbay Orınbaev jıynalǵanlardı Qaraqalpaqstan Respublikası Konstituciyası qabıl etilgen kún múnásibeti menen qızǵın qutlıqladı.
Ilajda atap ótilgenindey, bıyıl Qaraqalpaqstan Respublikası Konstituciyasınıń qabıl etilgenine 33 jıl toldı. Konstituciyamız – bul kóp milletli xalqımızdıń awızbirshiligin hám doslıǵın bekkemlewshi, olardı ullı dóretiwshilik islerge baslap beriwshi tiykarǵı hújjet esaplanadı. Insan mápi hámme nárseden ústinligin, onıń huqıqların menen erkinliklerin, milletleraralıq tatıwlıqtı, puqaralardıń tınıshlıǵın hám abadan turmısın támiyinlew Konstituciyamızda belgilep qoyılǵan bolıp, usı tiykardaǵı iygilikli háreketler búgingi kúnde turmısımızda óz kórinisin tappaqta.
Elimizdiń rawajlanıw basqıshlarına názer taslar ekenbiz, ekonomikamızdıń jıldan-jılǵa bekkemlenip baratırǵanı, xalıqtıń sociallıq jasaw sharayatınıń jaqsılanıp atırǵanı Konstituciyamızǵa tiykar etip alınǵan, tereń hám puqta oylanǵan iygilikli maqsetlerdiń nátiyjesi bolıp esaplanadı.
Usı jerde sonı da atap ótiwimiz kerek, elimizde húrmetli Prezidentimizdiń basshılıǵında Qaraqalpaqstan Respublikası boyınsha óz aldına qabıl etilgen qararlar, mámleketlik baǵdarlamalar turmısımızda úlken orın iyelep kelmekte. Búgingi kúnde respublikamızda usı qabıl etilgen qarar hám pármanlar, mámleketlik baǵdarlamalar tiykarında úlken qurılıs-ońlaw hám abadanlastırıw jumısları, salmaqlı dóretiwshilik baslamalar ámelge asırılmaqta.
Ótken dáwir ishinde respublikamızdıń barlıq tarawlarında ózgerisler júz berip, úlken reformalar ámelge asırıldı. Álbette, bul ámelge asırılǵan ilajlardıń huqıqıy tiykarı Konstituciya bolıp esaplanadı.
Bayram ilajı kórkem óner hám mádeniyat xızmetkerleri atqarıwındaǵı koncert baǵdarlaması menen dawam etti.
Qaraqalpaqstan xabar agentligi