Usı jıldıń 6-aprel kúni Qaraqalpaqstan Respublikası Joqarǵı Keńesiniń onınshı sessiyası bolıp ótti.
Sessiyaǵa Ózbekstan Respublikası Oliy Majlisi Senatı aǵzaları, deputatlar, ministrlikler hám taraw basshıları, ǵalaba xabar qurallarınıń wákilleri qatnastı.
Dáslep Ózbekstan hám Qaraqalpaqstan Respublikalarınıń mámleketlik gimnleri jańladı.
Sessiyanı Qaraqalpaqstan Respublikası Joqarǵı Keńesiniń Baslıǵı Amanbay Orınbaev basqarıp bardı.
Joqarǵı Keńes Baslıǵı sońǵı jılları Prezidentimizdiń Qaraqalpaqstanǵa bolǵan ayrıqsha itibarı menen ámelge asırılǵan keń kólemli dóretiwshilik jumıslarǵa toqtap ótti.
Sessiyanıń kún tártibi boyınsha dáslep Qaraqalpaqstan Respublikasında barlıq tarawlarda alıp barılıp atırǵan reformalardıń barısın xalıq arasında keńnen úgit-násiyatlaw haqqındaǵı másele kórip shıǵıldı.
Kún tártibindegi másele boyınsha Joqarǵı Keńestiń komitet baslıǵı Sh.Ótemisov bayanat jasadı hám ámelge asırılıp atırǵan dóretiwshilik jumıslar haqqında maǵlıwmat berdi. Kún tártibindegi másele deputatlar tárepinen tolıq kórip shıǵıldı hám qarar qabıl etildi.
Bunnan soń puqaralardıń huqıqların qorǵaw, jınayatshılıqtıń aldın alıw hám jınayatshılıqqa qarsı gúresiw baǵdarında 2025-jılda ámelge asırılǵan jumıslar haqqında Qaraqalpaqstan Respublikası prokurorı Sh.Aminov bayanat jasadı. Bul másele de deputatlar tárepinen tolıq qarap shıǵılıp, tiyisli qarar qabıl etildi.
Bunnan soń “Qalalıq jolawshılar transportı haqqında”ǵı Qaraqalpaqstan Respublikasınıń Nızamı hám tiyisli húkimetlik qararları talaplarınıń orınlanıwı boyınsha Transport ministrligine jiberilgen Parlamentlik sorawdıń nátiyjesi haqqında Qaraqalpaqstan Respublikası Transport ministri B.Seytmuratov shıǵıp sóyledi. Kún tártibindegi bul másele de kórip shıǵılıp, deputatlar tárepinen qarar qabıl etildi.
Sessiyada 2025-jılda orınlardaǵı norma dóretiwshiligi jumısı hám huqıqtı qollanıw ámeliyatı, huqıqıy úgit-násiyat hám aǵartıwshılıqtıń jaǵdayı haqqında Qaraqalpaqstan Respublikası Ádillik ministriniń málimlemesi haqqındaǵı másele boyınsha Ádillik ministri E.Tursunov bayanat jasadı. Bul másele de deputatlar tárepinen tolıq qarap shıǵılıp, qarar qabıl etildi.
Kún tártibindegi keyingi másele yaǵnıy, fizikalıq hám yuridikalıq táreplerdiń jer uchastkalarınan nızamsız paydalanıw hám xızmetkerlerdiń arasında korrupciyanıń aldın alıwǵa qaratılǵan jumıslar boyınsha Kadastr agentligi Qaraqalpaqstan Respublikası basqarmasına jiberilgen Parlamentlik sorawdıń nátiyjesi haqqında Kadastr agentligi Qaraqalpaqstan Respublikası basqarmasınıń baslıǵı I.Tleuov bayanat jasadı. Bul másele de tolıq kórip shıǵılıp, deputatlar tárepinen qarar qabıl etildi.
Kún tártibindegi gezektegi másele Qaraqalpaqstan Respublikası Ekologiya hám klimat ózgeriwi komitetiniń 2025-jıl dawamında ámelge asırǵan jumısları haqqında Ekologiya hám klimat ózgeriwi komitetiniń baslıǵı L.Seitova bayanat jasadı. Bul másele boyınsha da deputatlar tárepinen tiyisli qarar qabıl etildi.
Bunnan soń Oraylıq bank Qaraqalpaqstan Respublikası Bas basqarmasınıń 2025-jıl dawamında ámelge asırǵan jumısları haqqında Oraylıq bank Qaraqalpaqstan Respublikası Bas basqarmasınıń baslıǵı A.Isakov bayanat jasadı. Másele tolıq kórip shıǵılıp, qarar qabıl etildi.
Sessiyada ózbasımshalıq penen iyelep alınǵan jer uchastkasına bolǵan ijara huqıqı jáne olarda qurılǵan imaratlar menen obektlerge bolǵan múlk huqıqı tán alınıp atırǵan puqaralardıń dizimin sessiya qararı menen tastıyıqlaw máselesi de kórip shıǵıldı.
Ózbekstan Respublikasınıń arnawlı Nızamın basshılıqqa alıp, ózbasımshalıq penen iyelep alınǵan jer uchastkasına bolǵan ijara huqıqı jáne olarda qurılǵan imaratlar menen obektlerge bolǵan múlk huqıqı tán alınıp atırǵan 1793 puqaranıń dizimi sessiya qararı menen tastıyıqlandı.
Sessiya májilisiniń kún tártibindegi keyingi másele Joqarǵı Keńes Prezidiumınıń tiyisli qararların tastıyıqlaw máselesi haqqında bolıp, bul másele boyınsha da deputatlar tárepinen tiyisli qarar qabıl etildi.
Usınıń menen Qaraqalpaqstan Respublikası Joqarǵı Keńesiniń onınshı sessiyası óz jumısın juwmaqladı.
Qaraqalpaqstan xabar agentligi