Qubla Koreya Prezidenti Li CHje Myon dron menen baylanıslı hádiyse ushın Arqa Koreyadan keshirim soradı. Mámleket basshısınıń aytıwınsha, bul háreket mámleketlik siyasattı bildirmeydi, al ayırım shaxslardıń juwapkershiliksizligi nátiyjesi bolıp esaplanadı. Seul keleshekte bunday jaǵdaylar qaytalanbawı ilajı kóriletuǵının atap ótti. Bul bayanat húkimet májilisinde rásmiy túrde járiyalandı.
Tekseriwden málim bolıwınsha, hádiysede arnawlı xızmet – “National Intelligence Service” xızmetkeri hám bir ásker qatnasqan. Sonday-aq, 30 jaslar átirapındaǵı puqara dron ushırıwǵa baylanıslı nızamdı buzıwda ayıplandı. Oǵan qarsı aviaciya hám milliy qáwipsizlik qaǵıydasın buzıw statyası boyınsha is ashılǵan. Rásmiyler bunday háreket konstituciyaǵa qayshı ekenin bildirdi.
Aldınıraq Pxenyan qubladan jiberilgen dron mámleket aymaǵına kirgenin járiyalaǵan edi. Arqa koreyalılar waqıyanı “qatań provakciyalıq ámeliyat” sıpatında bahalap, dron urıp túsirilgenin aytqan. Seul dáslep áskeriy qatnasıwdı biykarladı hám qarsı tergew basladı. Sońǵı bildiriw bolsa jaǵdayǵa anıqlıq kirgiziw maqsetin gózleydi.
Sońǵı aylarda KXDR Qubla Koreyanı “dushpan mámleket” dep atap, óz-ara qatnasıqlardı jáne de suwıtqan. Ulıwma, bunday jaǵdaylar regionda keskinliktiń kúsheyiw qáwpin arttıradı. Qubla bolsa jaǵdaydı turaqlılastırıw, jańa kelispewshiliktiń aldın alıwǵa urınıp atırǵanın bildirmekte.
Qaraqalpaqstan xabar agentligi