Qádirli doslar!
Bárinen burın, siz, ázizlerdi – kóp milletli geologlar, injener hám qánigeler, jumısshı hám xızmetkerler jámáátin qutlı kásiplik bayramıńız benen qızǵın qutlıqlap, bársheńizge ózimniń joqarı húrmetim hám jaqsı tileklerimdi bildiremen.
Usı quwanıshlı áyyyamda sizlerdiń qıyın tábiyiy sharayatlarda pidákerlik penen miynet etip, jańadan-jańa kánler, mineral shiyki zat dereklerin tabıw, olardı elimizdiń rawajlanıwı, xalqımızdıń abadanlıǵı jolında isletiw baǵdarındaǵı úlken xızmetlerińizdi jáne bir márte minnetdarshılıq penen tán alamız.
Mine, usınday háreketlerińiz sebepli elimizde ulıwma bahası shama menen 3 trillion dollarǵa teń 2 mıń 500 den aslam kán hám 3 mıńnan aslam perspektivalı maydanlar anıqlanǵanı Ózbekstan úlken qazılma baylıqlar shiyki zat bazasına iye ekeninen derek beredi.
Sońǵı jılları mine usı rezervlerdi ózlestiriw hám usı tiykarda ekonomikamızdıń rawajlanıwına kúshli túrtki beriw boyınsha úlken jumıslardı ámelge asırmaqtamız. Sonıń ishinde, tarawǵa xalıqaralıq standartlar engizilip, investiciyalıq tartımlılıq arttırılmaqta, altın, gúmis, mıs, uran, uglevodorod kánleri hám maydanları sırt el investorları ushın da usınılmaqta, salıq stavkaları tómenletilmekte. Sonıń ushın dúnyadaǵı eń abıraylı kompaniyalar mámleketimizge jedel investiciya kirgizbekte. Házirgi waqıtta olar menen birgelikte ulıwma bahası 30 milliard 700 million dollar bolǵan 90 joybar ámelge asırılıp atırǵanı dıqqatqa ılayıq.
Búgingi kúnge shekem 1 mıń 458 paydalı qazılma obekti onlayn aukcion arqalı satıldı. Onıń esabınan mámleketlik byudjetke 1 trillion sumnan aslam qarjı tústi, 100 mıńǵa shamalas joqarı dáramatlı jańa jumıs orınları jaratıldı.
Sońǵı on jılda mámleketlik byudjetten 8 trillion 200 milliard sum qarjı qaratılǵanı 2 mıńǵa shamalas texnika hám texnologiyalardı engiziw, geologiya-izlew úskenelerin 70 procent jańalaw imkaniyatın berdi.
Elimizde vertolyot hám dronlar járdeminde aerogeofizika jumıslarınıń jolǵa qoyılǵanı, zamanagóy 3 D ólshemli seysmikalıq kompleks iske qosılıp, jer astın 9 kilometrge shekem tereńlikte geofizikalıq úyreniw imkaniyatınıń jaratılǵanı tarawdıń rawajlanıwında jańa dáwir baslanǵanınan derek beredi.
Tarawda báseki hám ashıq-aydınlıq ortalıǵı qáliplespekte. Uzaq jıllar dawamında itibardan shette qalǵan milliy geologiya mektebi hám bilimlendiriw sisteması qayta tiklendi, zamanagóy talaplarǵa juwap beretuǵın Geologiya ilimleri universiteti shólkemlestirildi. Aldınǵı sırt el mektepleriniń ilimiy potencialınan paydalanıw hám innovaciyalıq texnologiyalardı qollanıw maqsetinde Kompetenciyalar orayınıń jumısı jolǵa qoyıldı.
Mine usınday keń kólemli jumıslarımız sebepli 2016-2025-jıllarda 1 mıń 900 den aslam jańa kánler ashıldı. Eger 2016-jılı tastıyıqlanǵan uran rezervlerimiz 97 mıń tonnanı quraǵan bolsa, ótken dáwirde jáne 16 jańa kán anıqlanıp, rezerv 140 mıń tonnaǵa jetkerildi.
Jaqında Almalıqta jılına 60 million tonna rudanı qayta islew quwatlılıǵına iye bolǵan jańa mıs bayıtıw fabrikasın iske qostıq. Álbette, bunda da siz, miynetkesh geologlardıń ayrıqsha xızmetlerińiz bar ekenin, mine, usı megajoybar nátiyjesinde 6 mıńnan aslam joqarı dáramatlı jumıs ornı jaratılǵanı, kárxana esabına jılına 5 milliard dollar qarjı kelip túsiwin ayrıqsha atap ótpekshimen.
Húrmetli taraw xızmetkerleri!
Biz “Ózbekstan – 2030” strategiyasında geologiya tarawın bunnan bılay da rawajlandırıw boyınsha da keleshektegi wazıypalardı anıq belgilep aldıq. Elimizdiń mineral shiyki zatqa bay, perspektivalı aymaqların geologiyalıq jaqtan úyreniwdi keńeytiw, altın islep shıǵarıwdı – 1,5 esege, gúmisti – 3 esege, mıstı – 3,5 esege, uran, temir hám kómirdi – 3 esege arttırıwdı maqset etkenbiz.
Siz, jankúyer hám márt geologlardıń úlken bilim hám tájiriybeńiz, bekkem erk-ıqrar hám miynet súygishlik pazıyletlerińiz esabınan bul joqarı sheklerge álbette erisemiz, dep isenemen.
Taraw xızmetkerleriniń miynet hám turmıs sharayatların jaqsılaw, olardıń mashaqatlı jumısın múnásip xoshametlew máseleleri bunnan bılay da bárqulla itibarımız orayında boladı.
Sizlerdi búgingi qutlı áyyyam menen jáne bir márte shın júrekten qutlıqlap, bársheńizge bekkem densawlıq, maqtanıshlı jumıslarıńızda jańa tabıs hám áwmetler, shańaraqlarıńızǵa tınıshlıq hám abadanlıq tileymen.
Shavkat MIRZIYoEV,
Ózbekstan Respublikası Prezidenti