Prezidentimizdiń usı jıl 24-fevral kúni jaslar menen ótkergen sáwbeti dawamında alǵa qoyılǵan baslamaǵa muwapıq, ministrlikler, uyımlar hám shólkemlerde hár piyshembi kúni “Jaslar kúni”n ótkeriw dástúrge aylanbaqta.
Juwapkerler jaslar menen ushırasıwlarda olardıń mashqalaların úyreniw hám sheshiwge áhmiyet qaratpaqta.
Mine usı iygilikli baslama sheńberinde Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ámiwdárya rayonındaǵı bir qatar jumıssız hám atalıqqa alınǵan jaslar menen ushırasıw ótkerdi.
Ushırasıwdan aldın, jaslar ushın bos jumıs orınları miynet yarmarkası shólkemlestirildi. Bunnan tısqarı, jaslardıń baslamaların qollap-quwatlaw baǵdarında jaratılǵan sharayatlar, berilgen imkaniyatlar boyınsha prezentaciya jıynalǵanlardıń itibarına usınıldı.
Ilaj dawamında búgin elimizde ámelge asırılıp atırǵan jaslar siyasatı sheńberindegi reformalar haqqında tolıq maǵlıwmat berildi. Qaraqalpaqstanlı jaslar ushın mámleketimizde jaratılıp atırǵan imkaniyatlar, olardı qollap-quwatlaw baǵdarındaǵı jumıslarǵa toqtap ótildi. Sonıń menen birge, bunday imkaniyatlardan orınlı paydalanıp, joqarı nátiyjelerge erisip atırǵan jaslardıń sanı artıp atırǵanı ayrıqsha qanaatlanıwshılıq penen atap ótildi.
Ushırasıwda jaslardıń pikir-usınısları tıńlanıp, olardı qızıqtırǵan sorawlarǵa hár tárepleme juwap berildi. Onda tiykarınan, jumıs penen támiyinlew, isbilermenlik jumısın jolǵa qoyıw, jeńilletilgen kreditler alıw, kásip-óner úyreniw hám bilimlendiriw tarawına baylanıslı máseleler kóterildi.
Kóterilgen hár bir másele Joqarǵı Keńes Baslıǵınıń jeke qadaǵalawına alınıp, taraw juwapkerlerine tapsırmalar berildi.
Qaraqalpaqstan xabar agentligi