Qaraqalpaqstan Respublikası Joqarǵı Keńesiniń Baslıǵı Amanbay Orınbaev Saudiya Arabstanınıń «ACWA Power» kompaniyasınıń Ózbekstandaǵı baslıǵı Jon Zaidi basshılıǵındaǵı kompaniya wákilleri menen ushırastı.
Dáslep, Joqarǵı Keńes Baslıǵı Prezidentimiz tárepinen Qaraqalpaqstanda isbilermenlikti rawajlandırıw hám investiciyalıq ortalıqtı jaqsılaw boyınsha ayrıqsha itibar qaratılıp atırǵanın keń túrde atap ótti.
Ushırasıwda «ACWA Power» kompaniyası tárepinen samal elektr stanciyasın qurıw boyınsha respublikamız aymaǵında ámelge asırılıp atırǵan hám ámelge asırılıwı belgilengen perspektivalı joybarlar, sonday-aq, bar bolǵan imkaniyatlardan nátiyjeli paydalanıw máseleleri sóz etildi.
Usı jerde «Nókis-1» joybarı sheńberinde quwatlılıǵı 100 megavatt bolǵan samal elektr stanciyası qurılǵanlıǵın atap ótiw orınlı. Sonday-aq, Beruniy rayonında «Nókis-2» joybarı sheńberinde bahası 260 mln. dollarlıq 200 megavattlıq samal elektr stanciyası hám 100 megavattlıq energiya saqlaw sisteması qurılmaqta. Bunnan tısqarı, Qońıratta 2000 megavattlı samal elektr stanciyaların qurıw boyınsha ámeliy jumıslar baslanǵan.
Ótkerilgen ushırasıwda birge islesiwdi jáne de bekkemlew hám keńeytiw, qurılıs jumısları hám stanciya jumıslarına jergilikli puqaralardı tartıw, bunıń ushın zárúr kadrlardı tayarlawda Qaraqalpaqstandaǵı oqıw orınlarınıń imkaniyatlarınan paydalanıw sıyaqlı áhmiyetli máseleler dodalanıp, aldaǵı rejeler belgilep alındı.
Qaraqalpaqstan xabar agentligi