Yaponiyanıń RCC TV telekanalı Ózbekstannıń bay tariyxı, tartımlı turizm potencialı hám eki mámleket arasındaǵı doslıq baylanıslarǵa baǵıshlanǵan arnawlı kórsetiw tayarladı.
Baǵdarlamada mámleketimizdiń bay hám ráńbáreń turizm potencialı, dúnya jámiyetshiligindegi barǵan sayın bekkemlenip atırǵan unamlı imidji jáne Ózbekstan – Yaponiya mádeniy-gumanitarlıq baylanıslarınıń qáliplesiw tariyxı hár tárepleme tallanǵan.
Kórsetiw dawamında Samarqand, Buxara, Xiywa sıyaqlı tariyxıy qalalarımızdaǵı biytákirar arxitekturalıq estelikler, milliy dástúrlerimiz hám elimizdiń zamanagóy turistlik infrastrukturası haqqında tolıq maǵlıwmat berildi. Sonday-aq, mámleketimizde turizm tarawın rawajlandırıw boyınsha jedel reforma alıp barılıp atırǵanı, sırt el turistleri ushın qolaylı sharayat jaratılıp atırǵanı da ayrıqsha atap ótildi.
Dóretiwshiler mámleketlerimiz arasındaǵı kóp jıllıq doslıq qatnasıq, óz-ara isenim hám birge islesiwge tiykarlanǵan baylanıslardıń tariyxı hám búgingi kúndegi rawajlanıw basqıshı haqqında da sóz etti. Mádeniyat, bilimlendiriw, turizm tarawlarında ámelge asırılıp atırǵan birgeliktegi joybarlar mısalında paydalı sheriklik nátiyjesi sáwlelendirip berilgen.
Kórsetiw juwmaǵında xalıqaralıq maydandaǵı abırayı barǵan sayın artıp atırǵan Ózbekstan ashıq, doslıq siyasatı, bay tariyxı, mádeniy miyrası sebepli dúnya turistleri ushın tartımlı baǵdarǵa aylanıp atırǵanı atap ótilgen.
Ulıwma, bunday media joybarlar doslıq baylanısın jáne de bekkemlewi, eki xalıq arasındaǵı óz-ara túsinisiw hám jaqınlıqtı kúsheytiwge xızmet etetuǵını atap ótilgen.
Fardona YaXShIBOEVA,
ÓzAnıń xabarshısı