“Yuksalish” háreketi de qorshaǵan ortalıqtı qorǵaw hám tábiyatqa abaylı múnásibette bolıw ideyaların úgit-násiyatlaw maqsetinde 2019-jıldan berli mámlekettiń túrli aymaqlarında “Bir million terek” akciyasın ótkerip kelmekte.
Akciyanıń maqseti – toǵaylardı kesiw hám klimat ózgerisi tásirine qarsı gúresiw, adamlardı birlestiriw arqalı tereklerdi kóbeytiw hám ósiriw máselelerine itibardı tartıw. Bul joybar jılına eki márte – gúzgi (oktyabr-noyabr) hám báhárgi máwsimde (mart-aprel) ótkeriliwi rejelestirilgen.
Bıyılǵı akciyada sociallıq obektlerge tiyisli aymaqlarǵa itibar qaratılmaqta.
“Yuksalish” háreketi tárepinen Ózbekstan Respublikası Prezidenti janındaǵı Aral boyı xalıqaralıq innovaciya orayınıń kómeginde, 2026-jıl 1-aprel kúni Nókis qalasındaǵı 1-sanlı texnikum átirapına respublikamızda ótip atırǵan “Jasıl mákan” joybarı, “Bir million terek” akciyası sheńberinde terek egiӯ jumısları alıp barıldı.
Usı akciya sheńberinde aylant, katalpa, kiparis sıyaqlı jámi 100 (júz) dana sayamanlı terek nálleri egildi.
Bul akciya, mámleketlik emes kommerciyalıq emes shólkemler, Ózbekstan “Milliy tiklanish” demokratiyalıq partiyası Qaraqalpaqstan Respublikası Keńesi tárepinen qollap-quwatlandı hám akciyada tereklerdi egiw jumıslarına usı shólkemler menen birge texnikum jámááti hám student-jaslar qatnastı.
Egilgen nállerdiń keyingi ósip rawajlanıwına qaraw jumısların Nókis qalası 1-sanlı texnikumı jámááti óz juwapkershiligine aldı.
Bul akciya aymaqlardı kóklemzarlastırıwǵa úles qosıp ǵana qalmastan, jámiyette ekologiyalıq sana-sezim hám tábiyatqa abaylı qatnas sıyaqlı qádiriyatlardı qáliplestiredi. Hár qanday áwlad wákilleri, ásirese, ósip kiyatırǵan jaslardı tartıw arqalı bul baslama turaqlı keleshek ushın bekkem tiykar boladı.
Á.Jiyemuratov,
Qaraqalpaqstan xabar agentligi.