Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ámiwdárya rayonın sociallıq-ekonomikalıq rawajlandırıw hám xalıqtıń turmıs sharayatın jaqsılaw baǵdarında ámelge asırılıp atırǵan jumıslar menen tanısıw maqsetinde usı rayonda boldı.
Joqarǵı Keńes Baslıǵı dáslep “Qıpshaq” máhállesindegi bazar aymaǵında ámelge asırılıwı belgilengen jumıslardı kózden ótkerdi.
Bunnan soń, “Gúlzar” máhállesindegi “RIZQBARAKA” JShJ tárepinen sawda orayın shólkemlestiriw, “Boyovul” máhállesindegi jeke isbilermen Doniyor Jumamuratov tárepinen mebel islep shıǵarıw, “CHordara”daǵı “Amudaryo EKO MARKET” JShJ tárepinen ekobazar hám zamanagóy avtomobil turar ornın shólkemlestiriw, “Inobat Xwjaniyazova” shańaraqlıq kárxanasınıń aǵash ustashılıǵı joybarları kózden ótkerildi.
“Jedel turmısqa qádem” kúndizgi qarap turıw xızmeti, “Qılıshbay” máhállesindegi Sardorbek Imomaddinovtıń oqıw orayın shólkemlestiriw, “Karaman” máhállesindegi Ómir Matyakubov shańaraǵındaǵı sharwashılıq joybarları, bunnan tısqarı, “KUNGRAD DRINKS” JShJnıń kótere sawda xızmetin shólkemlestiriw, “AMUDARYO YORUG`” JShJnıń shıǵındını qayta islew – ekilemshi granula islep shıǵarıw joybarları jumısları úyrenildi. Isbilermenler menen tıǵız islesiw arqalı jaqınnan járdem beriw boyınsha juwapkerlerge tapsırmalar berildi.
Úyreniwler dawamında respublikamız basshısı “DONO AVLOD” mámleketlik emes mektepke shekemgi bilimlendiriw shólkeminiń ashılıwında qatnastı hám jaratılǵan sharayatlar menen tanıstı.
Sonday-aq, “Jańa Ózbekstan” massivinde ámelge asırılǵan qurılıs jumısları hám abadanlastırıw basqarması tárepinen tólemli xızmetlerdi jolǵa qoyıw joybarları barıp kórildi.
Xalıqtıń abadan turmısın támiyinlew, jańa jumıs orınların jaratıwǵa qaratılǵan bunday joybarlardı jáne de kóbeytiw kerek ekenligi atap ótilip, juwapkerlerge anıq tapsırmalar berildi.
Joqarǵı Keńes Baslıǵı A.Orınbaevtıń basshılıǵında rayon belsendileri, ministrlik hám shólkemler, rayonlıq mákeme basshıları qatnasıwında májilis ótkerildi.
Onda xalıqtıń bántligin támiyinlew, olardıń turmısında ushırasıp kiyatırǵan mashqalalarǵa sheshim tabıw, rayonnıń sociallıq-ekonomikalıq jaǵdayın jaqsılaw baǵdarında ámelge asırılıp atırǵan jumıslar, sonday-aq, mámleketlik baǵdarlamalar sheńberindegi belgilengen wazıypalar, ámelge asırılıwı tiyis bolǵan ilajlardıń hám aldın berilgen tapsırmalardıń orınlanıwı haqqında sóz etildi.
Májiliste dáslep, máhállelerde jańa jumıs orınların jaratıw, isbilermenlikti jolǵa qoyıw boyınsha juwapkerlerdiń prezentaciyaları usınıldı.
Bunnan soń máhállelerdi abat etiw, infrastruktura menen baylanıslı mashqalalardı sheshiw, mámleketlik baǵdarlamalar sheńberinde joybarlardıń ámelge asırılıwı, jańa kárxanalardıń jumısların shólkemlestiriw, qayta tikleniwshi energiya dereklerin keńnen en jaydırıw, kámbaǵallıqtı qısqartıw, puqaralardıń turmıs dárejesin jaqsılaw baǵdarındaǵı wazıypalardıń orınlanıwı máseleleri sın kózqarastan kórip shıǵıldı.
Sonıń menen birge, puqaralardıń qosımsha dáramat alıwına járdemlesiw, jaslardıń bántligin támiyinlew, isbilermenlikti rawajlandırıw, kárxanalardıń jumıslarına jaqınnan járdem beriw, bank xızmetlerin hám bazar infrastrukturasın jaqsılaw boyınsha da tapsırmalardıń orınlanıwı máseleleri de dodalandı.
Joqarıda atap ótilgen jumıslardı ámelge asırıwda kemshiliklerge jol qoyıp, óziniń xızmet wazıypasına hám bildirilgen isenimge nemquraydılıq penen qaraǵanı ushın ayırım juwapkerler sınǵa alınıp, kemshilikler atap ótildi.
Qaraqalpaqstan xabar agentligi