Ózbekstanda mámleketlik hám jámiyetlik turmıstıń barlıq tarawların qamtıp alǵan keń kólemli reformalar izbe-iz ámelge asırılmaqta. Ekonomikanı liberallastırıw, investiciyalıq ortalıqtı jaqsılaw, mámleketlik basqarıwdı modernizaciyalaw hám sırtqı siyasatta ashıq-aydınlıq hám pragmatizmdi kúsheytiw bul processtiń tiykarǵı baǵdarlarına aylanǵan.
Reformalar ishki rawajlanıwdı xoshametlep, mámleketimizdiń xalıqaralıq maydandaǵı abırayın sezilerli dárejede arttırmaqta. Dúnyanıń abıraylı ǵalaba xabar quralları elimizdegi jańalanıwlardı hár qıylı baǵdarlarda tallap, processtiń mazmun-mánisine ayrıqsha itibar qaratpaqta.
Mir24: Tájikstan hám Ózbekstan Prezidentleri áyyemgi Buxara boylap seyil etti
Rossiyanıń “MIR24” basılımı Ózbekstan hám Tájikstan jetekshileri mámleketlik saparı sheńberinde Buxara qalasındaǵı tariyxıy estelikler menen tanısqanı haqqında xabar tayarladı. Materialda mámleket basshıları qalanıń kóp ásirlik mádeniy miyrası hám arxitekturalıq esteliklerin birgelikte kózden ótkergeni atap ótilgen. Bunday sapar etiwler eki mámleket arasındaǵı tıǵız birge islesiwdiń belgisi sıpatında bahalanǵan.
The Telegraph: 2026-jılı turistler eń kóp barǵan mámleketler
Ullı Britaniyanıń “The Telegraph” basılımı 2026-jıl turistlerdi jedel tartıp atırǵan mámleketler dizimine Ózbekstandı da kirgizgen.
Atap aytqanda, mámleketimizdiń Samarqand, Buxara, Xiywa sıyaqlı áyyemgi qalaları, Jipek jolındaǵı miyrası hám bay tariyxıy ortalıǵı turistler ushın tartımlı ekeni atap ótilgen.
The Times of India: Ózbekstandaǵı Islam civilizaciyası orayı Úshinshi Renessans perspektivasın sáwlelendiredi
Hindstannıń ” The Times of India ” basılımı arnawlı maqala arqalı Tashkentte ashılǵan Islam civilizaciyası orayın Jańa Ózbekstannıń “Úshinshi Renessans” ideyası sáwlelengen iri ilimiy-mádeniy joybar sıpatında bahalaǵan. Sonday-aq, Oraydıń mámlekettiń bay ruwxıy miyrasın izertlew hám dúnyaǵa kórsetiwde áhmiyetli orın iyelep atırǵanı atap ótilgen.
See.news : Amir Temur va diplomatiya
Egipettiń “See.news” basılımında bolsa Ámir Temurdıń diplomatiyalıq jumısına baǵıshlanǵan maqala basıp shıǵarılǵan. Avtor Sahıpqırannıń xalıqaralıq qatnasıqlar tariyxında tutqan ornın, mámleketlik basqarıw hám diplomatiyadaǵı kózqarasın talqılawǵa háreket etken.
APP: Ózbekstan agrosanaatı dúnya kólemine shıqpaqta
“Associated Press of Pakistan” dáreginde Ózbekstan agrosanaat tarmaǵı xalıqaralıq bazarǵa jedel shıǵıw basqıshına kirgeni atap ótilgen. Mámlekette awıl xojalıǵı tarawında ámelge asırılıp atırǵan reformalar, sonıń ishinde, eksport kóleminiń keńeyiwi, qayta islew hám zamanagóy texnologiyanı engiziw arqalı agrosanaat ónimleri xalıqaralıq talapqa beyimlestirilip atırǵanı haqqında sóz etildi. Bul process mámleket ekonomikasınıń turaqlılıǵın támiyinlewi, global birge islesiwdi bekkemlewi tán alınǵan.
Dilshod HAKIMOV, ÓzAnıń xabarshısı