Tájikstan Respublikası Prezidenti Emomali Rahmon Ózbekstan Respublikası Prezidenti Shavkat Mirziyoev penen birgelikte Ark qorǵanı, Poi Kalon hám Labi Hovuz kompleksleri menen tanıstı.
Ark qorǵanı Buxaranın áyyemgi qorǵanı bolıp, derlik 1500 jıl dawamında húkimdarlar rezidenciyası sıpatında xizmet etken. Onıń dáslepki imaratları biziń eramızǵa shekemgi IV-III ásirlerge tiyisli bolıp, házirgi kórinisi tiykarınan XVI ásirde qáliplesken. Burın ol saraylar, hákimshilik imaratlar, quralxanalardı óz ishine alǵan “qala ishindegi qala” bolǵan. Orta ásirlerde bul jerde Rudakiy, Ibn Sina hám keyin ala Omar Hayyam sıyaqlı ullı oyshıllar jasap, dóretiwshilik etkenligi atap ótildi.
Poyi Kalon kompleksi Buxaranıń eń sawlatlı hám belgili arxitekturalıq ansambllerinen biri sıpatında tájikstanlı miymanlarda úlken qızıǵıwshılıq oyattı. Ol 1127-jılı qurılǵan ataqlı 45,6 metrli minara, 1514-jılı qurılǵan hám 12 mıń adamdı sıydıra alatuǵın jome meshiti, sonday-aq, islam dúnyasınıń eń abıraylı bilimlendiriw mákemelerinen biri esaplanǵan Mir Arab medresesin óz ishine aladı. Meshit háwlisin qorshap turǵan 288 gúmbezli galereya, júzlegen ústinler hám siyrek ushırasatuǵın akustika kompleksine ayrıqsha sawlat baǵıshlaydı.
Labi Hovuz ansambli Buxarada saqlanıp qalǵan orta ásirlerge tiyisli sanawlı maydanlardan biri bolıp, onıń orayında áyyemgi háwiz jaylasqan. Ásirler dawamında qala xalqı bul jerge dem alıw, sáwbetlesiw hám sawda islew ushın kelgen. Kompleks quramına Kwkaldosh medresesi, Nadir Diywanbegi medresesi hám xanahaq kiredi.
Tájikstan jetekshisi hár bir tariyxıy esteliktiń kórkem úylesimliligine, milliy ónermentshilik úlgilerine hám tariyxıy eksponatlarǵa úlken qızıǵıwshılıq bildirdi. Joqarı mártebeli miymanǵa arxitekturalıq usıldıń ózine tán ózgeshelikleri, sonday-aq, naǵıslar hám belgilerdiń mazmun-mánisi haqqında tolıq maǵlıwmat berildi.
Buxaranıń bay tariyxı, Ullı jipek jolındaǵı ornı, ilim hám mádeniyattıń rawajlanıwına qosqan úlken úlesi haqqında sóz etetuǵın bul zıyarat orınları Tájikstan delegaciyasında tereń tásir qaldırdı.
ÓzA