Maastrixt qalasında jazıwshı Aleksandr Dyumanıń “Úsh mushketyor” romanınıń bas qaharmanı prototipi — Sharl de Bac de Kastelmorǵa tiyisli bolıwı múmkin bolǵan qaldıqlar tabıldı.
Nege dál ol bolıwı múmkin?
D‘Artanyan tap usı jerde, 1673-jılı Maastrixt qamalı waqtında qaytıs bolǵan.
Skelet burınǵı altar astınan tabılǵan. Ol dáwirde bunday húrmetke tek ǵana patsha shańaraǵınıń aǵzaları yamasa ullı qaharmanlar ǵana múnásip kórilgen.
Qabırǵalar janında mushket oǵi anıqlandı. Tariyxıy jılnamalarǵa bola, ápsanalıq mushketyordıń ómirine áyne kókireginen alǵan ayanıshlı jaraqatı noqat qoyǵan.
Házirgi waqıtta ilimpazlar genetikalıq materialdı salıstırıw ushın Kastelmor ata-tegindegi áwladlardı izlemekte. Eger qaldıqlardıń haqıyqatlıǵı tastıyıqlansa, bul áskeriy tariyx hám mádeniyat tarawında on jıllıqtıń eń áhmiyetli ashılıwlarınan birine aylanadı.
Qaraqalpaqstan xabar agentligi