Qaraqalpaqstan Respublikası Joqarǵı Keńesiniń Baslıǵı Amanbay Orınbaev jaslar kúni sheńberinde bir qatar sportshı jaslar menen ushırastı.
Ushırasıwda dáslep, respublikamız basshısı mámleketimiz Prezidentiniń sportqa bolǵan ayrıqsha itibarı haqqında atap ótti. Sonı aytıp ótiw orınlı, elimizde húrmetli Prezidentimiz basshılıǵında barlıq tarawlar qatarında sporttı rawajlandırıwǵa ayrıqsha dıqqat qaratılıp, bul baǵdarda keń kólemli ilajlar ámelge asırılmaqta.
Sonıń ishinde, atap aytatuǵın bolsaq, ótken qısqa dáwir dawamında jańadan-jańa sport obektleri qurılıp, búgingi kúni de bunday iygilikli isler dawam etpekte. Sonıń menen birge, respublikamızda Olimpiada oyınlarına múnásip tayarlıq kóriw, jaslarımız arasınan dúnya arenalarında elimiz bayraǵın tanıtatuǵın sportshılardı jetilistirip shıǵarıw boyınsha da ámeliy jumıslar alıp barılmaqta. Óz gezeginde jas sportshılarımızǵa jaratılıp atırǵan bunday qolaylı sharayatlar sportshılarımızdı jańadan-jańa tabıslarǵa ruwxlandırmaqta.
Ótkerilgen ushırasıw dawamında Qaraqalpaqstan Respublikası Joqarǵı Keńesiniń Baslıǵı Amanbay Orınbaev sportshı jaslar, olardıń jaqınları hám trenerleri menen
jaqınnan sóylesip, olardıń bildirgen pikir-usınısların tıńladı hám hár bir másele belgilep alınıp, tez pursatta unamlı sheship beriw boyınsha juwapkerlerge anıq tapsırmalar berildi.
Qaraqalpaqstan xabar agentligi