Elimizde Prezidentimizdiń basshılıǵında “Insan qádiri ushın” degen iygilikli baslama tiykarında xalqımızdıń búgingi turmısınan razılıǵın támiyinlew baǵdarında keń kólemli ilajlar ámelge asırılmaqta. Bul baǵdarda alıs hám shetki aymaq turǵınlarınıń da mashqalalarına sheshim tabıw boyınsha ilajlar dawam ettirilmekte.
Qaraqalpaqstan Respublikası Joqarǵı Keńesiniń Baslıǵı Amanbay Orınbaev usınday ámeliy jumıslar qatarında respublikamızdıń eń shetki aymaqlarınan biri bolǵan Qońırat rayonındaǵı “Qaraqalpaqstan” posyolkalıq puqaralar jıyınına bardı.
Dáslep, bul jerde jańadan shólkemlestirilgen tuwıw bóliminiń ashılıw máresimi ótkerilip, Joqarǵı Keńes Baslıǵı jańa tuwıw bóliminiń paydalanıwǵa tapsırılıwı múnásibeti menen jıynalǵanlardı qutlıqladı.
Usı jerde Prezidentimizdiń tapsırması menen hám Prezident Administraciyası baslıǵınıń qollap-quwatlawı tiykarında alıs “Qaraqalpaqstan” posyolkası xalqı ushın altı yarım milliard sumlıq qáwenderlik qarjıları esabınan tuwıw bólimi qurılǵanın atap ótiw orınlı. Tuwıw bólimi zárúr úskeneler menen támiyinlenip, barlıq qolaylı sharayatlar jaratıldı.
Bunnan soń, Joqarǵı Keńes Baslıǵı kóshe biyleri, nuranıylar menen ushırasıp, jaqınnan sáwbetlesti. Aymaq turǵınlarınıń mashqalaları tıńlanıp, sheshimin tabıw ilajları kórildi. Hár bir bildirilgen múrájatqa unamlı sheshim tabıw boyınsha juwapkerlerge anıq tapsırmalar berildi.
Bunnan soń, posyolka xalqı menen birge jańalanıw hám jasarıw áyyyamı – Nawrız bayramı keń túrde belgilendi.
Qaraqalpaqstan xabar agentligi