Ózbekstan Respublikası Prezidenti Shavkat Mirziyoevtiń mirát etiwine bola Tájikstan Respublikası Prezidenti Emomali Rahmon 26-27-mart kúnleri mámleketlik sapar menen elimizde boladı.
Sapar etiw sheńberinde joqarı dárejedegi sóylesiwler jáne Ózbekstan hám Tájikstan jetekshileriniń basshılıǵında Joqarı mámleketleraralıq keńestiń birinshi májilisi bolıp ótedi.
Bolajaq ilajlardıń kún tártibinen Ózbekstan – Tájikstan doslıq hám jaqsı qońsıshılıq, strategiyalıq sheriklik hám awqamlaslıq qatnasıqların jáne de bekkemlew máseleleri orın alǵan.
Siyasiy sóylesiwdi bekkemlew, sawda-ekonomikalıq hám aymaqlararalıq birge islesiwdi keńeytiw, sanaat kooperaciyası hám transport tarawında óz-ara baylanıslılıqtı rawajlandırıw, suw hám energetika qáwipsizligin támiyinlew jáne keń kólemli mádeniy-gumanitarlıq almasıwlardı dawam ettiriwge ayrıqsha itibar qaratıladı.
Mámleket basshıları xalıqaralıq hám regionallıq áhmiyettegi máseleler jáne kóp tárepleme formatlar sheńberindegi birge islesiw boyınsha pikir alısadı.
Sonday-aq, bir qatar jańa qospa joybarlardı iske qosıw názerde tutılǵan, kóp tárepleme birge islesiwdi bunnan bılay da rawajlandırıwǵa qaratılǵan eki tárepleme hújjetlerdiń salmaqlı toplamına qol qoyılıwı rejelestirilgen.
ÓzA