Qaraqalpaqstan Respublikası Joqarǵı Keńesiniń Baslıǵı Amanbay Orınbaev isbilermenlikti rawajlandırıw, jańa jumıs orınların jaratıw arqalı xalıqtıń abadan turmısın támiyinlew baǵdarında ámelge asırılıp atırǵan jumıslar menen tanısıw maqsetinde Qońırat rayonında boldı.
Joqarǵı Keńes Baslıǵı dáslep “Elabad” máhállesindegi «Ustyurt star biznes» kárxanası tárepinen ámelge asırılıp atırǵan kir juwıw materialların islep shıǵarıw joybarı menen jaqınnan tanıstı. Isbilermenniń ónimlerin tek ǵana ishki bazarǵa emes, al eksportqa da baǵdarlaw ilajların kóriw boyınsha juwapkerlerge tapsırmalar berildi.
Bunnan soń, “Almazar” máhállesinde isbilermen X.Allaniyazov tárepinen ámelge asırılıp atırǵan tazalanǵan suw óndirisi hám qaǵazdı qayta islew joybarı, «Café Collection» kárxanasınıń tigiw hám trikotaj ónimlerin islep shıǵarıw joybarı, “Hákim ata” máhállesindegi M.Atamuratovtıń mebel islep shıǵarıw joybarı jumısları barıp kórildi.
Sonday-aq, «ASQARTAY-AMINTAY» shańaraqlıq kárxanası tárepinen qolǵap islep shıǵarıw, jeke tártiptegi isbilermenlerden M.Májitovtıń shulıq islep shıǵarıw, S.Seytmuratovtıń imaratlar fasadı ushın termopanel islep shıǵarıw, ónerment S.Esemuratovtıń saz ásbapların islep shıǵarıw joybarları kózden ótkerildi.
Bunnan soń, grant qarjıları tiykarında úskeneleri alıp kelingen «Kardio Kungrad» kárxanası, jáne bir qatar isbilermenlik joybarlarınıń barısı úyrenildi hám isbilermenlerdi qollap-quwatlaw, olardıń óz jumısın keńeytiwi ushın jaqınnan járdem beriw boyınsha juwapkerlerge anıq tapsırmalar berildi.
Joqarǵı Keńes Baslıǵı rayonda ámelge asırılıp atırǵan jumıslar menen tanısıw barısında renovaciya tiykarında qurılıp atırǵan kóp qabatlı turaq jaylardıń qurılısı, sonday-aq, “Jińishke” kanalı boyında ámelge asırılıp atırǵan jaǵalıq boyı xızmetlerin shólkemlestiriw jumısların da barıp kórdi. Qurılıs jumısların óz waqtında, sapalı etip juwmaqlaw boyınsha tapsırmalar berildi.
Bunnan soń, Qaraqalpaqstan Respublikası Joqarǵı Keńesiniń Baslıǵı A.Orınbaevtıń basshılıǵında Qońırat rayonın sociallıq-ekonomikalıq jaqtan rawajlandırıw máselelerine baǵıshlanǵan májilis ótkerildi.
Májiliste dáslep, xalıqtıń qosımsha dáramat alıwına járdem beriw, abadan turmısın támiyinlew baǵdarında Prezidentimiz tárepinen jaratıp berilgen jeńillikler keń túrde atap ótildi. Sonday-aq, jumıssız, sociallıq qorǵawǵa mútáj puqaralar, jaslardıń bántligin támiyinlew baǵdarında berilgen jeńillikler haqqında maǵlıwmatlar berildi.
Bunnan soń rayondı hár tárepleme rawajlandırıw, kámbaǵallıqtı qısqartıw, xalıqtıń bántligin támiyinlew hám investiciyalıq joybarlardı ámelge asırıw baǵdarındaǵı ámelge asırılıp atırǵan jumıslar, xalıqtıń múnásip turmıs sharayatın támiyinlew, jańa jumıs orınların jaratıw, abadanlastırıw jumısların alıp barıw sıyaqlı belgilengen wazıypalardıń orınlanıwı dodalandı. Sonday-aq, bul jumıslardı ámelge asırıwda ayırım juwapkerlerdiń óz wazıypasına nemquraydılıq penen qarap atırǵanı sınǵa alınıp, kemshilikler atap ótildi.
Sonıń menen birge, óz wazıypasın orınlawda qáte-kemshiliklerge jol qoyǵan ayırım juwapkerlerge intizamıy jaza sharaların qollanıw, zárúr bolsa, lawazımına ılayıqlıǵı máselesin kórip shıǵıw boyınsha tapsırmalar berildi.

Qaraqalpaqstan xabar agentligi