Prezident Shavkat Mirziyoev 24-mart kúni Jańa Tashkentte alıp barılıp atırǵan dóretiwshilik jumısları hám qurılısı rejelestirilip atırǵan jańa obektlerdiń joybarları menen tanıstı.
Mámleketimiz basshısı dáslep bul jerde qurılıp atırǵan iri sport obekti – zamanagóy futbol stadionınıń qurılıs procesin kózden ótkerdi.
Bul zamanagóy sport kompleksine ótken jıldıń 11-noyabr kúni mámleketimiz basshısı tárepinen tırnaq tası qoyılǵan edi.
Házirgi waqıtta stadion qurılısı jedel dawam etpekte. Sonıń ishinde, jerdi tegislew jumısları tolıq juwmaqlanǵan. Fundament quyıw jumısları toqsan bes procentke orınlanǵan. Qurılıs ornına metall-konstrukciya materialları basqıshpa-basqısh alıp kelinbekte.
Sońǵı jıllar mámleketimiz futbol tarawında túpkilikli burılıs dáwiri boldı. Sonıń ishinde, jergilikli chempionatlar sisteması reformalanıp, balalar hám jas óspirimler akademiyaları shólkemlestirildi, aymaqlarda 75 úlken hám 302 mini stadion jumıs alıp barmaqta.
Bizge belgili, 2017-jılı elimizde FIFA hám Aziya futbol konfederaciyası talaplarına juwap beretuǵın maydanlardıń sanı tek ǵana úshew bolǵan. Búgin olardıń sanı 10 nan astı.
Sonday-aq, 1,5 mıń mekteptiń futbol stadionları ońlanıp, 1 millionnan aslam oqıwshı hám máhálle jasları qamtıp alındı. Jaslar arasında máhálle, rayon, wálayat hám respublika turnirlerin dástúriy ótkeriw jolǵa qoyıldı.
Bul háreketler óz nátiyjesin bere basladı.
Futbol boyınsha olimpiya saylandı komandamız Parijdegi olimpiadada dáslepki márte qatnastı. Tariyxımızda birinshi márte milliy saylandı komandamız bıyılǵı jılı bolıp ótetuǵın jáhán chempionatına jollamanı qolǵa kirgizdi.
Ótken jıldıń 2-oktyabr kúni FIFA Keńesi májilisinde futbol boyınsha 20 jasqa shekemgiler arasında 2027-jılǵı jáhán chempionatın Ózbekstan hám Ázerbayjanda ótkeriw boyınsha qarar qabıl etildi.
Bul jáhán chempionatı sheńberindegi oyınlar eki mámlekettegi 3 ewden stadionda ótkeriledi. Jáhán chempionatlarınıń final hám yarım final oyınları sıyımlılıǵı 50 mıńnan aslam stadionda ótkeriliwi FIFA talaplarınan biri esaplanadı.
Mámleketimiz futbolı ushın áhmiyetli joybar – Jańa Tashkent stadionı usı maqsette qurılmaqta. Bahası 100 million dollarlıq bul stadion qurılısı ushın ne ushın áyne Jańa Tashkent aymaǵı tańlap alındı? Sebebi Jańa Tashkent keleshekte mámleketimizdiń jańa imkaniyatlar hám aldınǵı ideyalar orayına aylanadı.
Jańa Tashkent stadionı FIFAnıń barlıq talaplarına muwapıq qurılmaqta. Kompleks Aziyadaǵı eń iri hám zamanagóy infrastrukturaǵa iye futbol maydanlarınan biri boladı.
Bul imarat tek ǵana 2027-jılǵı 20 jasqa shekemgiler arasındaǵı jáhán chempionatı ushın emes, al pútkil ózbek futbolı hám jaslar sportınıń keleshektegi rawajlanıwı ushın xızmet etedi.
Mámleketimiz basshısına qurılıs procesi haqqında tolıq maǵlıwmat berildi.
55 mıń tamashagóyge mólsherlengen Jańa Tashkent stadionı 6 qabatlı boladı, onda tek ǵana sportshılar emes, al keliwshiler hám baspasóz xızmetkerleri ushın da keń qolaylıqlar jaratıladı. Tamashagóyler stadionǵa tez waqıt ishinde kirip-shıǵıwı ushın onnan aslam eskalator ornatıladı. Aymaqta jáne qosımsha 3 shınıǵıw maydanı boladı. Stadion janında metro bándirgisi qurıladı. 5 mıń 500 orınlıq avtomobil turatuǵın orın qurıladı.
Prezidentimiz bunday úlken sıyımlılıqtaǵı jabıq stadion mámleketimizde birinshi márte qurılıp atırǵanı ushın hár bir tárepke itibar beriw zárúrligin atap ótti. Stadion átirapın abadanlastırıw jumısların házirden rejelestirip, basqıshpa-basqısh ámelge asırıw zárúr ekenligi atap ótildi.
Prezident Shavkat Mirziyoev Jańa Tashkent qalasında qurılatuǵın fontan kompleksiniń joybarı menen de tanıstı.
Mámleketimizde xalıq ushın zamanagóy jámiyetlik orınlar, kewilashar hám mádeniy dem alıw orınların shólkemlestiriwge ayrıqsha itibar qaratılmaqta. Bunday joybarlar qalalardıń kórinisin bayıtıw, xalıq ushın qolaylı dem alıw ortalıǵın jaratıw, sonday-aq, jergilikli hám sırt el miymanlarınıń aǵımın kóbeytiwge xızmet etedi.
Jańa Tashkentte derlik 8 gektardan ibarat maydanda muzıkalı fontan kompleksin qurıw rejelestirilgen.
Joybarǵa bola, suw betiniń ulıwma maydanı 6,3 gektardı quraytuǵın basseynde 1,5 gektar maydanda suw, muzıka hám jaqtılıqtıń úylesimliligindegi shoulardı ótkeriw imkaniyatın beretuǵın fontan qurıladı. Kompleks quramında suwdı 232 metr biyiklikke shekem ótkere alatuǵın super fontan, diametri 100 metrli júziwshi platforma boladı.
Fontan radiusı 185 metr bolǵan, 360 graduslı suw ekranın payda etiw hám onıń betinde hár qıylı súwretlerdi proekciyalawǵa uqıplı boladı.
Sonday-aq, joqarı quwatlılıqtaǵı lazer nurları, dinamikalıq suw kompoziciyaları hám túrli vizual effektlerden paydalanıw rejelestirilgen. Nasos, elektr, lazerli proekciya hám basqa da texnikalıq sistemalar jer astındaǵı eki qabatlı imaratta jaylastırıladı.
Suw basseyni átirapında jasıl aymaqlar hám xızmet kórsetiw obektlerin shólkemlestiriw názerde tutılǵan. Bul kompleks Jańa Tashkenttiń eń dıqqatqa ılayıq orınlarınan birine aylanıwı, qalanıń arxitekturalıq kórinisin bayıtıwı hám hár qıylı mádeniy ilajlar, bayram hám festivallar ushın jáne bir zamanagóy orın bolıp xızmet etiwi kútilmekte.
Mámleketimiz basshısı joybardıń mazmunı, texnikalıq sheshimleri hám aymaqtı kompleksli abadanlastırıw máselelerine ayrıqsha itibar qarattı. Bul jerge keliwshiler ushın zamanagóy sawda, awqatlanıw hám servis xızmetlerin sapalı shólkemlestiriw áhmiyetli ekenligin atap ótti. Sonıń menen birge, usı aymaqta bıyılǵı Ǵárezsizlik bayramı múnásibeti menen shou ilajların joqarı dárejede ótkeriw zárúrligi atap ótildi.
Bunnan soń Prezident Shavkat Mirziyoevqa Jańa Tashkent qalası aymaǵında ámelge asırılıwı rejelestirilgen “Ullı jipek jolı” joybarı tanıstırıldı.
Bizge belgili, Jańa Tashkent qalasın qurıw sheńberinde birinshi basqıshta 6 mıń gektar aymaqta qurılıs jumısların ámelge asırıw názerde tutılǵan. Bul basqısh juwmaǵında 600 mıń xalıq ushın zamanagóy infrastruktura jaratıladı. Joybar tolıq ámelge asırılǵanda bolsa Jańa Tashkent 2 million xalıq jasaytuǵın zamanagóy megapoliske aylanadı.
Maydanı 32 gektar bolǵan “Ullı jipek jolı” kompleksi Jańa Tashkenttiń áhmiyetli jámiyetlik hám mádeniy orınlarınan biri bolıwı rejelestirilgen. Bul jerde turaq jaylar, kommerciyalıq imaratlar, miymanxanalar, mádeniyat hám bilimlendiriw orayları, sonday-aq, basqa da zamanagóy infrastruktura obektleri qurıladı.
Koncepciyaǵa bola, kompleks aymaǵında Ullı jipek jolı menen baylanıslı túrli civilizaciyalarǵa baǵıshlanǵan tematikalıq máhálleler shólkemlestiriledi. Hár bir aymaq Ullı jipek jolı boyında jaylasqan mámleketlerdi bildiredi.
Prezentaciyada Ózbekstan máhállesine ayrıqsha itibar qaratıldı. Bul jerde hár bir imarat, hár bir kóshe hám maydan arqalı xalqımızdıń tariyxı, mádeniyatı hám qádiriyatların sáwlelendiriw zárúr ekenligi atap ótildi.
Mámleketimizdiń bay tariyxıy miyrasın jáne de keńnen kórsetiw, ata-babalarımızdıń ilim, mádeniyat hám arxitektura tarawlarındaǵı jetiskenliklerin jas áwladqa jetkeriw, sonday-aq, xalıqaralıq turizm potencialın arttırıwǵa qaratılǵan bir qatar muzeylerdi renovaciyalaw rejeleri de kórip shıǵıldı.
Sonıń ishinde, Imam Moturidiy zıyarat ornında muzey shólkemlestiriw, onda “Jańa Ózbekstanda Imam Moturidiy miyrasına itibar,” “Imam Moturidiy ómiri” sıyaqlı tematikalıq zallar hám moturidiya táliymatına baǵıshlanǵan bólimler jaylastırıw rejelestirilgen. Sonday-aq, “Bahawaddin Naqshband” ilimiy-innovaciyalıq muzeyiniń jumısın mazmun jaǵınan bayıtıw, ásirese, “Jeti pir” zalında ullı oyshıllardıń ómirin hám miyrasın zamanagóy túrde keńnen sáwlelendiriw boyınsha usınıslar bildirildi.
Bunnan tısqarı, Temuriyler tariyxı mámleketlik muzeyin zamanagóy muzeytanıw hám dizayn sheshimleri tiykarında renovaciyalaw rejesi haqqında da málimleme berildi. Onda ekspoziciya zalların qayta qáliplestiriw hám keliwshilerge joqarı dárejedegi vizual hám aǵartıwshılıq tájiriybeni usınıs etiw názerde tutılǵan. Hár bir zal óz aldına tariyxıy dáwir hám temaǵa arnalǵan.
Usınılǵan joybarlardıń ulıwma maqseti milliy tariyxımızdı ilimiy tiykarda tereń sáwlelendiriw, zamanagóy mádeniy infrastrukturanı qáliplestiriw hám mámleketimizge keletuǵın miymanlar ushın tartımlı turizm mákanların jaratıwdan ibarat.
Joybarlar mámleketimiz basshısı tárepinen maqullandı, olardı ámelge asırıw boyınsha tiyisli tapsırmalar berildi.
ÓzA