Ózbekstan Respublikası Prezidenti Shavkat Mirziyoev 24-mart kúni Rossiya Federaciyası Prezidenti Vladimir Putin menen telefon arqalı sóylesti.
Ózbekstan-Rossiya keń kólemli strategiyalıq sheriklik hám awqamlaslıq qatnasıqlarınıń joqarı dárejedegi kelisimlerdi ámelge asırıw sheńberinde jáne de rawajlandırıw hám bekkemlewdiń áhmiyetli máseleleri kórip shıǵıldı.
Sawda-ekonomikalıq birge islesiw jedel rawajlanıp atırǵanı qanaatlanıwshılıq penen atap ótildi. Ótken jıldıń juwmaǵına bola, tovar almasıw kólemi 10 procentke ósip, 13 milliard dollarǵa jetti, usı jıldıń basınan bolsa jáne 32 procentke kóbeydi.
Sanaat, energetika, transport hám ekonomikanıń basqa tiykarǵı tarmaqlarında iri kooperaciya joybarların ámelge asırıw dawam etpekte.
Ózbekstanda birinshi atom elektr stanciyasın kóriw joybarın alǵa qoyıwǵa ayrıqsha itibar qaratıldı.
Ekonomikalıq birge islesiw boyınsha húkimetleraralıq birgeliktegi komissiyanıń nátiyjeli jumısına joqarı baha berildi.
Tárepler kooperaciyanıń jańa túri hám joybarların alǵa qoyıw ushın nátiyjeli maydanǵa aylanǵan “INNOPROM Oraylıq Aziya” xalıqaralıq sanaat kórgizbesiniń gezektegisin usı jıldıń aprel ayında Tashkent qalasında ótkeriwge belsene tayarlıq kórip atırǵanı atap ótildi.
Xalıqaralıq áhmiyettegi máseleler, sonıń ishinde, Jaqın Shıǵıs, Qubla Aziya hám Ukrainadaǵı jaǵday boyınsha pikir alısıldı.
Bolajaq ilajlardıń rejesi de dodalandı.
ÓzA