Ózbekstan Respublikası Prezidenti Shavkat Mirziyoev 20-mart kúni Túrkmen xalqınıń milliy jetekshisi, Túrkmenstan Xalıq Másláháti Baslıǵı Gurbanguli Berdimuhamedov penen telefon arqalı sóylesti.
Sóylesiw aldınan jetekshiler bir-birin múbárek Ramazan hayıtı hám báhárgi Nawrız áyyyamı múnásibeti menen qızǵın qutlıqlap, eki mámlekettiń tuwısqan xalıqlarına tınıshlıq-tatıwlıq, abadanlıq hám turaqlı rawajlanıw tiledi.
Mámleketimiz basshısı Túrkmenstan Prezidenti Serdar Berdimuhamedovqa da qızǵın qutlıqlawların jolladı.
Ózbekstan menen Túrkmenstan arasındaǵı doslıq, jaqsı qońsıshılıq hám strategiyalıq sheriklik qatnasıqları jedel rawajlanıp atırǵanı qanaatlanıwshılıq penen atap ótildi.
Barlıq dárejelerde nátiyjeli sóylesiwler dawam etpekte. Tovar almasıw kóleminiń turaqlı ósiwi, sonıń ishinde, tayar ónimlerdi jetkerip beriw arqalı támiyinlenbekte. Jaqında iske qosılǵan “Shavat-Tashawız” sawda zonasınıń nátiyjeli jumısı da óz-ara sawdanıń artıwına xızmet etpekte.
Júk tasıwlardıń kólemi, sonıń ishinde, Túrkmenbashı portı arqalı izbe-iz artpaqta. Energetika, sanaat, suw xojalıǵı hám transportta kooperaciya keńeyip barmaqta, Parlamentleraralıq, aymaqlararalıq, isbilermenlik hám mádeniy-gumanitarlıq almasıwlardı keńeytiwge ayrıqsha itibar qaratıldı.
Tárepler Jaqın Shıǵıs hám Qubla Aziyada júzege kelip atırǵan jaǵday boyınsha da pikir alıstı. Turaqlı tınıshlıqqa erisiwdiń birden-bir jolı jaǵdaydı siyasiy-diplomatiyalıq ilajlar menen sheshiw ekeni atap ótildi.
Usı jılı názerde tutılǵan kóp hám eki tárepleme ilajlar rejesi de dodalandı.