20-mart kúni Ózbekstan Respublikası Prezidenti Shavkat Mirziyoev hám Pakistan Islam Respublikası Bas ministri Shahboz Sharif arasında telefon arqalı sóylesiw bolıp ótti.
Eki mámleket jetekshileri pútkil musılman úmmeti ushın muqaddes bolǵan Ramazan hayıtı – Iyd al-Fitr hám qutlı Nawrız bayramları múnásibeti menen bir-birin qızǵın qutlıqladı. Dos Ózbekstan hám Pakistan xalıqlarına tınıshlıq-tatıwlıq, abadanlıq hám turaqlı rawajlanıw tilekleri bildirildi.
Ózbekstan Prezidentiniń usı jıl fevral ayında Pakistanǵa ámelge asırǵan mámleketlik saparı eki tárepleme strategiyalıq sheriklik qatnasıqların jańa sapa basqıshına kótergeni ayrıqsha atap ótildi.
Joqarı dárejedegi sapar etiwden soń ministrlikler, uyımlar hám aymaqlar dárejesindegi sóylesiwler jáne de jedelleskeni, óz-ara almasıwlar anıq nátiyjeler menen bayıp atırǵanı ayrıqsha qanaatlanıwshılıq penen atap ótildi.
Sóylesiw dawamında tárepler sońǵı waqıtlarda Qubla Aziya hám Jaqın Shıǵıs regionındaǵı keskinlikten ayrıqsha qáweterlenip, hár qanday kelispewshilik hám mashqalanı tek ǵana tınısh hám diplomatiyalıq qurallar arqalı sheshiw zárúr ekenligin atap ótti.