Ózbekstan Respublikası Prezidenti Shavkat Mirziyoev 19-mart kúni Ázerbayjan Respublikası Prezidenti Ilham Aliev penen telefon arqalı sóylesti.
Mámleket basshıları jaqınlasıp kiyatırǵan Ramazan hayıtı hám Nawrız bayramı múnásibeti menen bir-birin qızǵın qutlıqlap, dos xalıqlarımızǵa tınıshlıq-paraxatshılıq, abadanlıq hám rawajlanıw tiledi.
Sóylesiwde Joqarı mámleketleraralıq keńestiń ekinshi májilisinde erisilgen kelisimlerdi ámelge asırıw sheńberinde Ózbekstan – Ázerbayjan strategiyalıq sheriklik hám awqamlaslıq qatnasıqların bunnan bılay da keńeytiw máselelerine ayrıqsha itibar qaratıldı.
Tovar almasıw turaqlı artıp baratırǵanı, sawda-ekonomikalıq, investiciyalıq, transport, mádeniy-gumanitarlıq hám basqa da tiykarǵı tarawlarda birgeliktegi kooperaciyalıq joybarlar alǵa qoyılıp atırǵanı qanaatlanıwshılıq penen atap ótildi.
Tárepler, sonday-aq, Jaqın Shıǵıstaǵı jaǵdaydı dodaladı. Onıń jáne de keskinlesiwi keń region ushın aldınnan aytıp bolmaytuǵın aqıbetlerge, jáhán ekonomikasınıń recessiyasına alıp keliwi múmkin ekenligi, jaǵdaydı tek ǵana siyasiy-diplomatiyalıq qurallar menen tez pursatta jumsartıw zárúr ekenligi atap ótildi.
Bolajaq eki hám kóp tárepleme ilajlardıń rejesi de kórip shıǵıldı.
ÓzA