Prezident Shavkat Mirziyoev Samarqandqa saparınıń ekinshi kúni Imam Moturidiy estelik kompleksinde ámelge asırılıp atırǵan dóretiwshilik jumısları menen tanıstı.
Mámleketimiz basshısınıń qararına muwapıq, ótken jılı elimizde aqida iliminiń tiykarın salıwshı Abu Mansur Moturidiydiń tuwılǵan kúniniń 1155-jıllıǵı keńnen belgilendi. Usı múnásibet penen Samarqand qalasındaǵı CHokardiza qoyımshılıǵı aymaǵında Imam Moturidiy kompleksin qayta ońlaw hám abadanlastırıwǵa kirisilgen edi.
Házirgi waqıtta kompleks hám onıń átirapında qurılıs-abadanlastırıw jumısları dawam etpekte. Ulıwma maydanı 26 gektar bolǵan aymaqta Imam Moturidiy kompleksi qayta qurılıp, 250 orınlıq meshit, kiriw peshaywanı, ilimiy oray, kitapxana, muzey hám avtomobil turatuǵın orın qurılmaqta.
Sonday-aq, qurılıs jumısları procesinde CHokardiza qoyımshılıǵında ullı faqih Burhoniddin Marǵinoniy jerlengen orın da anıqlanıp, bul jerde mavzoley qurılmaqta.
Ulamalar eske alınıp, Quran oqıldı.
Mámleketimiz basshısı dóretiwshilik jumıslardı kózden ótkerip, bul jer dúnya musılmanları umtılatuǵın zıyarat orınlarınan biri ekenin atap ótip, bul jerde olar ushın zaman talaplarına say sharayat jaratıw zárúr ekenligin atap ótti.
– Komplekske kelgen adam bárinen burın Imam Maturidiy babamızdıń ilimiy-ruwxıy miyrası, islam dúnyasında tutqan ornı haqqında ayqın túsinikke iye bolıwı, ilimpazdıń aǵartıwshılıq kózqarasları búgin de áhmiyetli ekenin seziwi kerek, – dedi Prezident.
Qurılıstı sapalı hám óz waqtında orınlaw, aymaqta jasıl maydanlardı kóbeytiw boyınsha tapsırmalar berildi.

ÓzA