Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qaraózek rayonına barıp, aymaq xalqınıń turmıs sharayatın jaqsılaw, puqaralardıń bántligin támiyinlew hám isbilermenlikti rawajlandırıw baǵdarında ámelge asırılıp atırǵan jumıslar menen tanıstı.
Respublikamız basshısı eń dáslep awıl xojalıǵı tarawında alıp barılıp atırǵan reformalardıń barısı menen tanısıw maqsetinde, Berdaq awıl puqaralar jıyını aymaǵında jumıs júrgizip atırǵan «Qaraózekli Batırbay» fermer xojalıǵında jamǵırlatıp suwǵarıw úskenelerin ornatıw jumısların, Qaraózek APJ aymaǵındaǵı «Qalim Bekbolat» fermer xojalıǵında hám Mádeniyat APJ turǵını Genjemurat Turdımuratovtıń úy aldı qıytaq jerinde shólkemlestirilgen ıssıxanalarda boldı.
Onda awıl xojalıǵına jańa suwǵarıw texnologiyaların engizip, jerden nátiyjeli paydalanıp kiyatırǵan taraw pidayılarına harmasın aytıp, mámleketimiz Prezidentiniń arnawlı qararı tiykarında jaratılıp berilgen keń imkaniyat hám múmkinshiliklerden nátiyjeli paydalanıw kerekligin atap ótti.
Bunnan soń, Ata mákan máhállesinde jaylasqan rayonlıq toǵay xojalıǵında grant qarjıları tiykarında ámelge asırılıp atırǵan joybarlar, Abadanlastırıw basqarması tárepinen pullı xızmetler kórsetiwdi shólkemlestiriw boyınsha jumıslar barısı kórip shıǵıldı.
Sonday-aq, Joqarǵı Keńes Baslıǵı 2026-jılı rayonda ámelge asırılıwı rejelestirilgen investiciyalıq joybarlardıń prezentaciyaları, ««SIFAT INVEST KOMPANIYASI» JShJ kárxanası tárepinen qamıs hám paxta paqalınan DSP islep shıǵarıw joybarları menen tanıstı hám jańa joybarlardıń óz waqtında iske túsiriliwin támiyinlew boyınsha juwapkerlerge anıq tapsırmalar berdi.
Usılar menen bir qatarda rayon orayındaǵı 2-sanlı texnikumda grant qarjıları tiykarında ámelge asırılǵan jumıslar kózden ótkerilip, sırtqı biyǵárez kómekler hám grant qarjıların tartıw arqalı aymaqta bunday joybarlardı kóbeytiw kerek ekenligi atap ótildi.
Sonıń menen birge, BPO orayı jumısı da kórip shıǵılıp, onıń imkaniyatlarınan nátiyjeli paydalanıw boyınsha kórsetpeler berildi.
Sońınan rayon hákimliginiń májilisler zalında Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵında Qaraózek rayonın sociallıq-ekonomikalıq jaqtan rawajlandırıw máselelerine arnalǵan májilis ótkerildi.
Májiliste dáslep xalıqtıń qosımsha dáramat alıwına kómeklesiw hám abadanlıǵın támiyinlew máseleleri dodalandı. Bul baǵdarda, húrmetli Prezidentimizdiń Qaraqalpaqstanǵa bergen ayrıqsha jeńillikleri, párman hám qararlar sheńberinde xalıqqa jaratılǵan imkaniyatlar haqqında keń túrde sóz etildi. Sonday-aq, jumıssız, sociallıq qorǵawǵa mútáj puqaralar hám jaslardıń bántligin támiyinlew baǵdarında berilgen jeńillikler haqqında maǵlıwmatlar berildi.
Bunnan soń rayondı hár tárepleme rawajlandırıw, kámbaǵallıqtı qısqartıw, xalıqtıń bántligin támiyinlew hám de investiciyalıq joybarlardı ámelge asırıw baǵdarında ámelge asırılıp atırǵan jumıslar, xalıqtıń múnásip turmıs sharayatın támiyinlew, jańa jumıs orınların jaratıw, abadanlastırıw jumısların alıp barıw sıyaqlı belgilengen wazıypalardıń orınlanıwı hám basqa da máseleler sın kózqarasta kórip shıǵılıp, bul jumıslardı ámelge asırıwda ayırım juwapkerler tárepinen jol qoyılǵan kemshilikler atap ótildi.
Sonıń menen birge, óz wazıypasın atqarıwda qáte-kemshiliklerge jol qoyǵan ayırım juwapkerlerge intizamiy jaza sharasın qollaw, zárúr bolsa, lawazımına ılayıqlıǵın kórip shıǵıw boyınsha tapsırmalar berildi.
Qaraqalpaqstan xabar agentligi